В Атырау +4 
Қазақстанның Жол жүрісі қағидаларына ұшқышсыз көлік құралдарын пайдалану бойынша арнайы талаптар енгізілді. Енді автопилотпен жүретін көліктердің қозғалысы қатаң реттеледі.
Басты жаңашылдық — ұшқышсыз көліктер кез келген жерде жүре алмайды. Олар үшін қолжетімді аумақтардың шекарасын нақты айқындайтын арнайы жол жүрісін ұйымдастыру схемасы әзірленеді.
Схемада нақты не көрсетіледі:
ұшқышсыз көліктердің жүруіне рұқсат етілген көшелер мен тасжол учаскелерінің нақты шекаралары;
нақты маршруттар, сондай-ақ рұқсат етілген аумаққа кіру және одан шығу нүктелері;
қозғалыстың рұқсат етілген бағыттары, автотұрақтар мен көлік қою орындары;
жылдамдық режимдері және қосымша жергілікті шектеулер.
Ұшқышсыз көліктің бекітілген аумақтан тыс жерге шығуына қатаң тыйым салынады.
Ұшқышсыз көліктер жол ережелерін қалай сақтайды?
Құжатта ақылды көлік құралдары жол қозғалысының барлық стандартты талаптарын мүлтіксіз орындауға міндетті екені атап көрсетілген. Автономды көліктер бағдаршамдар мен реттеушілердің сигналдарын, жол белгілері мен таңбаларын «көріп», оларға бағынуы, қауіпсіз арақашықтықты сақтауы, басып озу, маневр жасау, қиылыстардан өту ережелерін орындауы және басқа жол қозғалысына қатысушыларға жол беруі тиіс.
Ұшқышсыз көлікті полиция тоқтатса, не істеу керек?
Жол-патрульдік полициясымен өзара әрекеттесу тәртібі де жеке қарастырылған. Егер полиция қызметкері көлікті тоқтатып, тұраққа қоюды талап етсе, қашықтан басқару операторы бұл талапты дереу орындап, көлікті көрсетілген жерде тоқтатуға міндетті.
Егер нақты орын көрсетілмесе, оператор көлікті басқа жүргізушілер мен жаяу жүргіншілерге кедергі келтірмейтін және қауіп төндірмейтін ең жақын рұқсат етілген жерге қоюы тиіс.