Дубайдың халықаралық әуежайында жолаушыларды тексеруден өткізетін жаңа жүйе сынақтан өткізіле бастады. «Ақылды туннель» деп аталатын құжаттық тексеру адамның еш қатысуынсыз жұмыс істейді. Биометрикалық сканерлер орнатылған туннельде жолаушыларды тексеруге әдеттегі 2 минуттың орынына бар-жоғы 15 секунд кетеді.
Саяхатшы алдымен «ақылды туннельдің» алдындағы қақпада тіркеуден өтеді. Одан кейін 80 камера орнатылған аквариум секілді туннельге кіреді. Жолаушы жан-жағына қарағанда көздің қарашығы, бет әлпеті түсіріліп, аты-жөні расталса, еденде жасыл шам жанады. Ал жолаушы тексерістен өтпесе қызыл жанады.
Мохаммед Ахмед әл-Марри, БАӘ миграциялық қызметі басшысы:
- Бұл жүйе алдымен ақпараттық технологиялар көрмесінде көрсетілді. Ал қазіргі мына жоба төрт жыл бұрын қолға алынған болатын. Жалпы «ақылды туннель» жүйесінде ең жаңа, бірегей технология қолданылады.
Брюс Свенсон, америкалық саяхатшы: - Маған жүйе ұнады. Бастапқыда оның шынайы тексеріс екенін түсінбей қалдым. Бірақ жүйенің қалай жұмыс істейтінін ұққан соң бәрі оңай екенін көрдім.
Дереккөз: 24.kz