Арзан картоп екі есе көбеймек

Өткен қыс пен көктемде Атырау облысының тұрғындарына жергілікті тұрақтандыру қорынан шамамен мың тоннадай көкөніс сатылды. Алдағы күзгі-көктемгі кезеңде көкөністерді былтырғыға қарағанда үштен бір есеге көп сатып алу жоспарланып отыр. Ал картоп көлемі 2 есеге дейін көбейеді , - деді «Атырау ӘКК» АҚ басқарма төрағасының орынбасары Амантай АЙТБАЕВ.

А.Айтбаевтың айтуынша, барлық өнім: 1207 тонна картоп, 115 тонна пияз, 100 тонна сәбіз, 111,2 тонна қырыққабат бір жеткізушіден - Махамбет ауданындағы «Агро Феликс» шаруа қожалығынан сатып алынады.

Қыс басталғанда «әлеуметтік» азық-түлік өнімдеріне (көкөністерден басқа - ұн, жармалар, қант, жұмыртқа, күнбағыс майы және т.б.) баға белгілейтін тұрақтандыру қорының комиссия отырысы өтеді.

Мұрат СҰЛТАНҒАЛИЕВ