Ақтөбеде бүйрегін ауыстырған науқасқа көмектескен шенеунік қызметінен айырылуы мүмкін

Этика жөніндегі кеңес Ақтөбе облысы фармация басқармасы басшысының орынбасарын жұмыстан шығаруға кеңес берді. Ақтөбе облысы фармация басқармасы басшысының орынбасары Ақтау қаласында тұратын бүйрегін ауыстырған науқасқа аса қажет дәрі-дәрмекті тауып беріпті. Алғыс айтудың орнына шенеунікке қызметтік өкілеттігін асыра пайдаланды деген айып тағылды, деп хабарлайды Sputnik тілшісі.

Облыстық фармация департаменті басшысының орынбасары Қанағат Ахметовтің ісін этика жөніндегі облыстық кеңес ұзақ қарастырды. Бір жағынан шенеуніктің айыбы жоқ болатын. Ол дәрішіден "Майфортик" препаратын сұрапты. Бұл дәріні бүйрегін ауыстырған науқастарға тағайындайды және олардың өмірі үшін ауадай қажет болып табылады. Таблетканы органды ауыстырған кезде ағзаның қабылдамауының алдын алу үшін ішу керек. Дәріші шенеуніктің өтінішін жерге тастамай, сұраған дәрісін береді. Бірақ оны басқа науқастың атына жазған екен.

Ахметовтың өзі айтқандай, адамгершілік жасағысы келіп, адамның өміріне араша түспек болған. Жемқорлыққа қарсы қызмет бұл әрекетті қызметтік өкілеттігін асыра пайдалану деп бағалады, өйткені саны шектеулі препарат Ақтөбедегі науқастарға жетпей қалуы мүмкін еді. Ақтау тұрғынының өмірін сақтап қалған Қанағат Ахметов ақтөбеліктің өмірін қауіпке тікті, деп пайымдайды жемқорлыққа қарсы қызмет.

Этика бойынша кеңес мүшелерінің пікірінше, жақсы ниет өкілеттікті асыра пайдалануға негіз бола алмайды, сол себепті шенеунікті жұмыстан шығаруға кеңес берілді.

Дереккөз: sputniknews.kz