Сауд Арабиясының королі BinLaden Group фирмасына қарсы санкция енгізді

Сауд Арабиясының королі Сальман бен Абдель-Азиз Аль Сауд BinLaden Group құрылыс фирмасына қарсы санкция қабылдау туралы нұсқау берді, деп хабарлайды France-Presse (AFP) агенттігі.

«Бұдан былай BinLaden Group корпорациясы тендерлер мен жаңа мемлекеттік жобаларға қатыса алмайды. Корпорация басқарушы кеңесінің мүшелеріне компанияға қатысты басталатын заңдық іс-әрекеттер аяқталғанға дейін ел аумағынан шығуға тыйым салынды», - делінген AFP хабарламасында.

Меккеде кранның құлауына себеп болған құрылыс жұмыстарын дәл осы BinLaden Group корпорациясы жүргізген болатын. Айта кетсек, қайғылы оқиғадан 107 адам ажал құшқан еді, олардың басым бөлігі қажылық парызын өтеуге келген адамдар, деп жазады ИТАР-ТАСС.

Істің мән-жайын анықтаған комиссия «аталған оқиғаға Saudi BinLaden Group компаниясының да жарым-жартылай қатысы бар» деген қорытындыға келген. Белгілі болғандай, құрылыс жұмыстары кезінде корпорация қауіпсіздік ережелерін сақтамаған көрінеді.

Дереккөз: bnews.kz