7 қыркүйектен бастап Атырау облысында «Қайыршы» жедел-алдын алу шарасы жүргізіледі. Бір апта ішінде полицейлер 240-тан астам құқық бұзушыны ұстады.
– ҚР Әкімшілік құқық бұзушылық туралы кодекстің 449-бабына сәйкес, қоғамдық орындарда сатып алу, сату, сондай-ақ бал ашу, қайыршылық, сексуалдық сипатта қызметтер көрсету не өзге де
қызметтер көрсетуді күштеп таңу мақсатында тиісу, яғни мазалап өтініш білдіруге тыйым салынады, - дейді ІІД баспасөз қызметінің жетекшісі Гүлназира МҰХТАРОВА.
Атап айтқанда, 188 қайыршы, жеке тасымалдау қызметін тықпалағаны үшін 31 адам, сексуалдық қызмет ұсынған – 2 адам әкімшілік жауапкершілікке тартылды. Мәселен, Атырау қалалық ІІБ әкімшілік полиция бөлімінің қызметкерлері Балықшыдан қайыр тілеумен айналысып жүрген 43 жастағы ер адамды ұстады. Алғаш ұсталып отырмағандықтан, ол 5 тәулікке қамалды.
– Тәртіп бұзушыларға барлығы 700 мың теңгедей айыппұл салынды, - деп хабарлады Г.Мұхтарова.
Тамара СУХОМЛИНОВА