В Атырау -10 
Сербия Қазақстанмен ЕАЭО аясында Fiat автомобилін экспорттау мәселесін талқылады, - деп хабарлайды Tengrinews.kz тілшісі.
"Сауда-экономикалық қарым-қатынас жөнінде үкіметаралық комиссия отырысын ұйымдастыру жайлы сөйлестік. Сербия үшін Еуразиялық Одақ аясында Fiat автомобилін экспорттау өте маңызды", - деді Сербия президенті Томислав Николич.
Ол екі ел арасындағы энергетика, құрылыс және ауыл шаруашылығы салаларындағы екіжақты қарым-қатынастың болашағы зор екенін айтты.
Қазақстан Президенті екі ел арасындағы сауда-экономикалық қарым-қатынасының әлсіз екенін, оны дамыту керектігін жеткізді.
"Сербия Республикасы - Қазақстан үшін маңызды серіктестердің бірі. Дегенмен, сауда-саттық деңгейі төмен. Біз ауылшаруашылық, фармацевтика, құрылыс, қайта өңдеу және транспорттық коммуникация салаларында серіктес болуды жоспарлап отырмыз", - деді Нұрсұлтан Назарбаев.
Тараптар келесі жылы үкіметаралық комиссия отырысын өткізуге келісті.
"Қазақстанда қазіргі кезде Сербия капиталымен құрылыс және сауда-саттық саласында 20 өнеркәсіп жұмыс істеп жатыр. Сербиялық компаниялар Алматыдағы метрополитен кешенін салуға қатысты, қазір Астанадағы құрылыс жұмыстарына қатысып жатыр", - деді Назарбаев.
Николич Қазақстанға шақырғаны үшін Нұрсұлтан Назарбаевқа алғыс білдірді және Астананың ауқымды даму қарқыны өзін тәнті еткенін айтты.
Дереккөз: tengrinews.kz