Үлескерлер мәселесі сот арқылы шешілуі тиіс - Жақсыбеков

Үлескерлер мәселесі сот арқылы шешілуі тиіс. Әділбек Жақсыбеков мұндай пікірімен аппараттық жиын барысында бөлісті, - деп хабарлайды Tengrinews.kz тілшісі Астана әкімдігінің ресми сайтына сілтеме жасап.

Жиын барысында үлескерлер мәселесі туралы сөз қозғаған елорда әкімі жергілікті атқарушы биліктің жер телімдерін жобалау, құрылыс жүргізу және нысанды пайдалануға беру үшін беретінін атап өтті. Ал бұл кезеңдердің бұзылғаны үшін заң алдында құрылыс компанияларының басшылары жауап берулері тиіс.

"Иә, біз бұл нарықтағы жағдайды біліп отыруымыз керек. Құрылыс барысы мен жер телімдерінің игерілуіне талдау жасап отыруымыз қажет. Тек осы ғана", - деді Жақсыбеков. Оның айтуынша, әлемдік тәжірибеге сүйенсек, мұндай түйткілді мәселелер сот немесе өзге де тиісті органдар арқылы ғана шешіледі.

Сонымен қатар, әкім Астана қаласының қазіргі санитарлық жағдайына тоқтала келе, қала құрылымдарының басты мақсаты - елорданың келбетін тиісті деңгейде ұстап тұру екенін ескертті. Бұл жұмысты бақылауда ұстау үшін әкімнің бұйрығымен жүйелі түрде жұмыс істейтін мобильді топ құрылған. Фото есептерге және өзге де қағазбастылыққа жол бермеу мақсатында Жақсыбеков бұл жұмысты электронды түрде жүргізуді тапсырды.

"Жұмыстың қалай жүріп жатқанын кез-келген уақытта қадағалап, көруіміз үшін ескертулерге қатысты барлық суреттер мен есептерді менің және орынбасарларымның кабинеттерінде орналасқан мониторларға шығару қажет. Сол арқылы кемшіліктерді дер кезінде көріп, тез арада олқылықтың орнын толтырамыз", - деді әкім.

Дереккөз: tengrinews.kz