9 шілдеде кешкі сағат жетілерде Атырауда бәстескен үш ер адам айналма көпірден қатар секірді. Екеуі жағалауға аман-есен жүзіп шықты, біреуіне көмек қажет болды.
ТЖД-ға айналма көпір маңында ер адамның суға батып бара жатқаны туралы құпия қоңырау келіп түскен. Судан құтқару қызметінің қызметкерлері «Виндбот-47» мотоқайығымен оқиға орнына жетіп, өзен ортасынан суға бата бара жатқан ер адамды көрген.
Ер адам мас екен, құтқарушылар оны катерге көтеріп шығара алмаған, қолынан ұстап жағалауға сүйреп шығарған. Ол жасы 30-да екенін, оқиға орнына жақын маңда – Огородный көшесінде тұратынын айта алған. Екі досымен бірге бәстесіп көпірден секірген екен. Құтқарылған жігіт сол жерге жеткен жол-патрульдік полициясының экипажына табысталды. Қалалық №2 полиция бөлімінде оған ҚР ӘҚтК-тің 440-бабында («Алкогольдік ішімдіктерді iшу немесе қоғамдық орындарға масаң күйде келу») қарастырылған құқықбұзушылық жасағандығы туралы хаттама толтырып, 19 820 теңге мөлшерінде айыппұл салынды.
Мұрат СҰЛТАНҒАЛИЕВ