Студенттер полигонға барады

АтМГИ жанындағы «Құлсары» эксперименталды оқу-өндірістік полигоны 1 қыркүйекте өз жұмысын бастамақ. Бұл туралы полигон директоры Жомарт ЖАНТӨРИН хабарлады.

- Полигон Құлсары қаласынан 10 шақырым жердегі «Ембімұнайгаз» АҚ-на қарасты кен орнында орналасқан. Бұл Қазақстандағы техникалық жоғары оқу орындарының арасындағы бірінші жоба, - дейді Жантөрин.

Оның айтуынша, бүгінде қыркүйекте өндірістік тәжірибеден өтетін «Мұнай және газ ісі» мамандығы бойынша 2-ші және 3-ші курста оқып жатқан 40 студент таңдалынып алынған. Олар екі топқа бөлініп оқып, жұмыс істейді. 20 студент 15 күн полигонда жұмыс істеп, қалған жартысы ол уақытта оқуда болады. Осылайша бір-бірімен ауысып отырады.

- Теорияны практикамен ұштастыру - студенттерге нағыз керек нәрсе, - дейді Жантөрин. – Олар онда төрт мамандық алып шығады: қабатты қысымды қалпында ұстау жөніндегі оператор, мұнай газ өндіру операторы, ұңғымаларды зерттеу операторы, күрделі жөндеу операторы. Олармен арада еңбек шарты жасалады. Еңбекақыларын «Ембімұнайгаз» өндірістік басқармасы төлейді.

Айнұр САПАРОВА