30 сәуірде шамамен сағат 14-те Атырауда орталық көпірден ер адам секіріп кетті. Оқиғаға түскі үзілістен соң жұмыстарына келе жатқан облыстық ІІД-нің екі офицері куә болған.
ІІД баспасөз қызметінің жетекшісі Гүлнәзира МҰХТАРОВА хабарлайды: «Әкімшілік полиция басқармасы бастығының орынбасары Мұрат ДИМЕГЕНОВ пен ІІД-нің ерекше тапсырмалар жөніндегі аға инспекторы Болат ДҮЙСЕНОВ түскі үзілістен соң кеңсеге келе жатқан. Орталық көпір бойымен келе жатып ер адамның көпір таянышына мініп, төменге секіріп кеткенін көреді. Олар кардиологиялық аурухана (БСМП) ғимаратына жетіп, жағалауға жүгіреді. Дүйсенов бәтіңкесін шешіп, формасымен суға секірген. Бірнеше метр жүзіп барып, суға кетіп бара жатқан адамды жағалауға алып шығады».
Дәрігерлер өз өмірін қиғысы келген ер адамның физикалық тұрғыда зардап шекпегенін анықтады. Ол ішімдік ішкен екен. Оның мұны не үшін жасағанын анықтау шаралары алынуда.
Мұрат СҰЛТАНҒАЛИЕВ