17 ақпан күні Доссор поселкесінде 52 жастағы әйел адамның мүрдесі табылды.
- Полицияның жедел іздестіру шараларының нәтижесінде Доссор поселкесінің 1978 жылғы тұрғыны Т. К. күдікті ретінде ұсталып, уақытша тергеу изоляторына қамалды, - деп хабарлайды Мақат ауданы прокурорының орынбасары Досбол БАҒЫТЖАНОВ. - Күдікті кінәсін толық мойындап отыр. Ол әйелдің үйіне мас күйінде келген, марқұм оны үйден шығуын талап еткен. Осы кезде екеуі сөзге келіп, бұған шыдамаған күдікті оны сол жерде бас-көзге қарамай соққының астына алған. Ауыр соққыдан әйел жан тапсырған.
Бүгінде күдіктінің үстінен ҚР ҚК 106-бабы 3-тармағы бойынша («Денсаулыққа ауыр зиян келтіру, абайсызда адам өліміне соқтыру») қылмыстық іс көтеріліп, тексерілуде.
Ләззат ҚАРАЖАНОВА