Минск келіссөзі екінші күнге жалғасты

Минск келіссөзіне қатысушы Украина, Ресей, Германия мен Франция басшылары. 11 ақпан 2015 жылШығыс Украинадағы қарулы қақтығысты тоқтату туралы Минск келіссөзі 11 сағатқа созылды. Кездесуге Украина президенті Петр Порошенко, Германия канцлері Ангела Меркель, Франция президенті Франсуа Олланд және Ресей президенті Владимир Путин қатысуда.11 ақпан күні түнге қарай басталған келіссөз 12 ақпанның таңына дейін ұласып отыр. Батыс дипломаттарының сөзінше, сәрсенбі кешкісін басталған келіссөз кезінде қарсы тараптар негізгі мәселелерге қатысты ортақ қадамға бармаған.

Келіссөз алдында Порошенко кездесуді "қақтығысты тоқтатуға берілген соңғы мүмкіндік" деп атаған. "Интерфакс" агенттігінің хабарлауынша, Порошенко "Я шиеленіс тарқап, бітім жасалып, ауыр қару-жарақ шығарылады, болмаса жағдай бақылаудан шығады" деген. Порошенко бұл жолы келісім жасалмаса, елді соғыс жағдайында деп жариялайтынын айтқан.

Төрт президент келіссөз кезінде бірнеше мәрте жабық есік жағдайында бір-бірімен біресе жеке-жеке, біресе сыртқы істер министрлерімен, біресе кеңесшілерімен кеңескен.

Германия сыртқы істер министрлігі "келіссөз ауыр жүріп, бірақ жалғасып жатқанын" хабарлап, сыртқы істер министрі Франк-Вальтер Штайнмайер Бразилияға баратын сапарынан кешігіп жатқанын айтты.

Ал Ресей сыртқы істер министрі Сергей Лавров бұдан ертерек керісінше, келіссөз "жап-жақсы жүріп жатқанын" айтқан.

Украина президентінің көмекшісі Валерий Чалый Facebook-те 12 ақпан  таңға жуық келіссөз әлі кемінде алты-жеті сағатқа созылуы мүмкін екенін жазған. Чалый "Бізге бұл жерден қақтығысты тоқтату туралы кесімді келісім жасаспай кетпеу керек" деді.

Мұның алдында украиналық делегация Reuters агенттігіне Минскіде өтіп жатқан Украина, Ресей, Германия және Франция жетекшілерінің келіссөзінен соң Украинаның территориялық тұтастығына кепілдік беретін бірлескен декларацияға қол қойылуы мүмкін екенін хабарлаған.

Ақпарат көзінің мәлімдеуінше, бұл декларацияны Украина, Ресей мен ЕҚЫҰ үшеуінің байланыс топтары әзірлеп жатыр. Құжат былтыр қыркүйекте Минскіде жасалған келіссөз шарттарын орындау туралы міндеттемелерден тұрады.

Минскіде келіссөз жүріп жатқан күні Украинаның шығысында ел әскері мен ресейшіл сепаратистер арасындағы қарулы қақтығыс толастамай бірнеше адам оққа ұшты. Донецкідегі ауруханалардың біріне тағы снаряд тигені хабарланды.

Былтырғы көктемде Ресей Қырымды аннексиялап алған соң Украинаның шығысында қарулы сепаратистер бас көтеріп, бүгінге дейін Донецк және Луганск облыстарында соғыс жүріп жатыр. Осы қақтығыс кезінде өлгендер саны 5 мыңнан асып кетті.

2014 жылғы қыркүйекте Украина мен Ресей өкілдері Минскіде оқ атуды тоқтату туралы келісімге қол қойған. Бірақ соңғы айларда жағдай ушыға түскен соң өткен аптада Германия мен Франция Ресей мен Украинаға жанжалды реттеу бойынша жаңа ұсыныс жасаған.

Дереккөз: azattyq.org