Спорт жаңалықтары

Үстелден сәл биік

«Мұнайшы» ДСК-нде үстел теннисінен 1997-98 ж.т., 1999 ж.т. және одан кіші жасөспірімдер мен қыздар арасында облыстық біріншілік өтті. Жарысқа Атырау қаласының және Индер мен Жылыойдан басқа барлық аудандардың командалары қатынасты.

Жарыс жеңімпаздары болып 1997-98 ж.т. – Айдана Шамишева (Құрманғазы ауданы) мен Климентий Бузаев, 1999 ж.т. және кіші – Мария Емельянченко мен Руслан Юн (соңғы үшеуі Атырау қаласынан) танылды. Жеңімпаздар мен жүлдегерлер медальдармен және облыстық спорт басқармасының  дипломдарымен марапатталды. Турнирдің ең жас қатысушысы арнайы жүлдеге ие болды – ол №21 орта мектептің 2-сынып оқушысы - Еркін Иманалиев. Жарысқа жаттықтырушы Риза Мамутов төрелік етті.

***

Бассейндегі турнир

«Мұнайшы» спорт кешенінің бассейнінде балалар мен ересектер арасында жүзуден қала біріншілігі өтті.
Өз жас ерекшеліктері бойынша келесілер жеңімпаз атанды: 50 метр, арқамен жүзу - Диар Ғизатов; 100 метр, кроль - Дамир Алтайұлы, Жәнібек Мүбенов, Алексей Суслов; 100 метр, брасс – Д.Алтайұлы, Әділхан Жауыр, Данила Белусов, Бақдаулет Әбу; 100 метр, арқамен жүзу - Александр Зыков, А.Жауыр, Бауыржан Тостанов, А.Суслов; 100 метр, баттерфляй - Біржан Халенов, Ж.Мүбинов, Б.Әбу; 200 метр, кешенді жүзу – Б.Халенов, Жарас Амангелді, Юрий Грузинцев, А.Суслов.

***

Күзетшілер күресті  

«Динамо» күш құрылымдары мен құқық қорғау органдары спорт қоғамының ашық чемпионатына дайындық аясында Ақтөбеде полиция күзет бөлімшелерінің қызметкерлері арасында самбодан іріктеу спартакиадасы өтті. 

Жарыстарға еліміздің барлық өңірінен147 күзет қызметкері қатысты. Атырау құрамасының қоржынында 1 алтын, 1 күміс және 1 қола бар. 74 келіге дейін салмақта «Күзет» ҚДЖ басқармасының аға сержанты Дулат Балимов жеңімпаз атанды. 62 келіге дейін салмақта оның әріптесі Данияр Әлиев күміс алды. 90 келіге дейін салмақта «Күзет» қызметкері Алтынбек Матеуов қолаға қол жеткізді. 

***

Франция мен Бразилияға жолдама

Джиу-джитсудан Астанада өткен ҚР чемпионатында облыс құрамасы сәтті өнер көрсетті. Қоржында 1 алтын, 1 күміс, 3 қола бар. 

Чемпиондық белдік пен Францияда өтетін әлем чемпионатына баратын жолдаманы 84 келіге дейін салмақта Мирас Шынтасов ұтып алды. Күміс медаль мен Бразилияда өтетін әйелдер арасындағы әлем чемпионатының жолдамасына 62 келіге дейін салмақта Нұрсұлу Қапсалихова қол жеткізді. 15-17 жас ерекшелік тобында Ернар Қожахметов, Серікболсын Асылбек және Еркебұлан Серіков өз салмақ дәрежелерінде қола жүлде алды.

***

Тоғыздан бір төбе

Шымкентте жасөспірімдер, жастар және шеберлер арасында армрестлингтен Қазақстан чемпионаты өтті.

Білектілер жарысына еліміздің 11 өңірінен 400-ге тарта спортшы қатысты. Біздің облыстың намысын Владислав Алексеев, Нұржан Қызбаев, Фархад Сәрсембиев, Александр Сушко, Роман Ахиялов, Аман Бисақов, Әлібек Нұртұяқов, Игорь Хан және Дастан Байсымақов сындытоғыз жігіт қорғады.

Құрама қоржынына жалғыз жүлдені 85 келіге дейін салмақта Мұнай және газ институтының студенті Аман Бисақов салды. Ол жарыстың қола жүлдегері атанды. Осылайша Аман Токиода өтетін Азия чемпионатына қатысатын Қазақстан құрамасының сапына қосылды.

Спортшылар мен жаттықтырушы С.Передистый облыстық дене тәрбиесі және спорт басқармасының басшысы А.Раушановқа өз алғыстарын айтады. 

Сурет С.Передистыйдікі

***

Дәстүрден жаңылмады

Мәскеу түбіндегі Зеленоград қаласында каратеден (KWF, WSKF, IJKA және WKC стильдерін біріктіретін нұсқа) IV ашық Бүкілресейлік ойындар өтті. 

Ойындарға Ресей мен ТМД елдерінен 1000-ға тарта спортшы қатысты. Біздің елімізден жарысқа аға жаттықтырушы Ерікқали Қойшекенов бастаған облыстық карате-до шотакан федерациясының шәкірттері қатысты.

Жарыс бағдарламасына кумите (қолма-қол айқас), ката, тамешивари (қолмен тақтай сындыру), фукуго кірді. Атыраулық спортшылар бұл ойындарға жыл сайын қатысады және ешқашан жүлдесіз оралған емес. Бұл турнирде де солай болды.

Кумитеден 14-15 жас аралығында Марал Қосаева, 16-17 жаста Ринат Жарылғасынов, ересектер арасында Аманғали Өтебалиев чемпион атанды. Манас Темірханов кумитеден қола медальға қол жеткізді. 16 жасар Нұрсұлтан Шабаев пен 10 жасар Бекзат Сайынов турнирдің үздік бес спортшысының қатарына енді. 

***

Палуандар сайысы

3-БЖСМ-де 2000-04 ж.т. балалар арасында грек-рим күресінен және 2000-03 ж.т. балалар арасында еркін күрестен қала біріншілігі өтті. 

Классикалық күрес шеберлері сайысына 90 палуан қатысты. Жеңімпаздар: 27 келіге дейін - Саид Войтович, 30 келіге дейін - Хамза Құспанов, 33 келіге дейін - Әлихан Жаңбыр, 36 келіге дейін - Дамир Рамазанов, 39 келіге дейін - Думан Есеналиев, 42 келіге дейін – Сәуірбек Қудабаев, 46 келіге дейін - Жамбыл Оразмұқан, 50 келіге дейін - Иса Қожасов, 54 келіге дейін - Айбек Рахатов, 58 келіге дейін - Бек Өтепқалиев.

Еркін күрес жарыстарында 170 палуан белдесті. Жеңімпаздар: 23 келіге дейін - Рамазан Қосжанов, 26 келіге дейін - Нұрлыхан Аманғали, 29 келі - Аман Боранбаев, 32 келі - Бейбарыс Қуанышев, 35 келіге дейін - Бағытжан Үсембай, 38 келіге дейін - Айдос Қизатов, 42 келіге дейін - Ерасыл Көкенов, 47 келіге дейін - Әлфараби Ақжігітов, 53 келіге дейін - Бекзат Жалғасов, 59 келіден жоғары - Нұртілеу Зейнепов.

Мұрат СҰЛТАНҒАЛИЕВ

***

Алғашқы медаль

Атырау облысы құрамасы көздері нашар көретін мүгедектер арасында дойбыдан Қазақстан чемпионатында алғашқы жүлдеге қол жеткізді. 

Биылғы чемпионат Алматыда 1994 ж.т. және одан кіші ер балалар мен қыздар арасында өтті. Құраманың бірінші нөмірлі спортшысы Аманқос Әбдешев сәтсіз өнер көрсетіп, мүмкін болар 12 ұпайдан 6 ұпай жинады. Екінші тақтада ойнаған Махамбет ауданы Алмалы ауылы мектебінің оқушысы Мейіржан Оңайбай одан да төмен 5 ұпай иеленді. Алайда бұлардан кейін жарысқа қосылған Ақжар ауылының 9-сынып оқушысы Мөлдір Қажемова 7 ұпай жинап, күміс жүлдегер атанды. Командалық есепте облыс құрамасы алдына Шығыс Қазақстан облысын, Алматы және Тараз қаласын салып, 4-орынға табан тіреді. Спортшылар «Атырау облысы мүгедектерінің спорттық клубы» КМК-де Еркін Үсеновтің жетекшілігімен жаттығады. 

Мұрат СҰЛТАНҒАЛИЕВ