В Атырау +25.2 
Кассациялық азаматтық істер жөніндегі сот апелляциялық сатыдағы соттың қаулысын жойып, өтініш берушінің ата-бабалары мен қайтыс болған С. арасындағы туыстық қатынастар фактісін анықтау туралы аудандық соттың шешімін күшінде қалдырды.
Бұған дейін апелляциялық сот өтінішті қанағаттандырудан бас тартқан болатын. Соттың пікірінше, өтініш берушіде мұрагерлік құқығы туындамаған, өйткені бірінші кезектегі мұрагер — мұра қалдырушының анасы болған. Ол мұра ашылғаннан кейін қайтыс болған.
Кассациялық саты бұл ұстанымды дұрыс емес деп таныды.
Сот заңдық маңызы бар фактіні анықтау туралы істі қарау кезінде оның құқықтық маңызы бар-жоғын және өтініш берушінің бұл фактіні басқа жолмен растай алатынын анықтау қажет екенін көрсетті. Ал мұраға кімнің, қандай кезектілікпен және қандай үлеспен құқығы бар деген мәселелер нотариус арқылы немесе жеке талап қою ісін жүргізу тәртібімен шешілуге тиіс.
Қаралып отырған істе туу және туыстық байланыстар туралы құжаттар жоғалған немесе сақталмаған. Бұл мұрағаттардың жауаптарымен, куәгердің айғақтарымен және отбасылық фотосуреттермен расталған.
Сонымен қатар кассациялық сот өтініш берушінің нақты ата-бабалары мен қайтыс болған С. арасындағы туыстық қатынастарды анықтауды сұрағанына назар аударды. Алайда апелляциялық сот іс жүзінде өтініш берушінің өзінің қайтыс болған С.-мен туыстығы туралы мәселені қараған. Осылайша, апелляциялық саты бастапқыда мәлімделмеген талапты шешкен.
Сондай-ақ апелляциялық сот бірінші сатыдағы сот шешімінен кейін пайда болған құжаттарға, соның ішінде мұра қалдырушының қайтыс болған күні туралы түзетілген жазбаға сілтеме жасаған. Алайда бұл мәліметтердің даудың мәні үшін неліктен маңызды екенін және олардың не себепті бұрын ұсынылмағанын түсіндірмеген.
Нәтижесінде апелляциялық соттың қаулысы жойылып, туыстық қатынастар фактісін анықтау туралы бірінші сатыдағы соттың шешімі күшінде қалдырылды.