В Атырау +30.6 
Қаржы нарығын реттеу және дамыту агенттігі «Сақтандыру нарығы туралы» жаңа заң жобасын және түзетулерді әзірледі. Басты жаңалық — жылжымайтын мүлікті қауіпті табиғи құбылыстардан міндетті сақтандыру қорғанысын енгізу болмақ.
Құжатқа сәйкес, міндетті сақтандыру түрлерінің қолданыстағы тізімі жаңа класспен толығады — қазақстандықтар баспанасын жер сілкінісінен, су тасқынынан (су басудан) және табиғи сипаттағы орман өрттерінен сақтандыруға міндетті болады.
Сақтандыру жүйесінде тағы не өзгереді:
Бірыңғай ережелер: Елде міндетті сақтандырудың бірыңғай моделі қалыптастырылады. Оған реттеудің жалпы принциптері бар қолданыстағы 8 міндетті класс пен жүктелген сақтандырудың 10 түрі кіреді.
Икемді шарттар: Заңның өзінде негізгі ережелер мен қорғау кепілдіктері жазылады. Бұл ретте экономикалық жағдайға байланысты нақты тарифтер мен қаржылық параметрлер заңға тәуелді актілер мен шарттар деңгейінде жедел реттеліп отырады.
Зейнетақы аннуитеттері: Әзірлеушілер, сонымен қатар, зейнетақы аннуитеттік өнімдерінің жаңа түрлерін іске қосу арқылы ерікті сақтандыруды ынталандыруды жоспарлап отыр.
Заң жобасы 2026 жылдың 7 қазанына дейін созылатын қоғамдық талқылауға шығарылды. Одан кейін құжат қарауға жіберіледі.