В Атырау +31 
Қазақстан Ұлттық банкі мобильді аударымдар кезіндегі бір транзакцияның ең жоғары сомасын 500 мыңнан 1 миллион теңгеге дейін ұлғайтуды ұсынады. Бұл туралы Ұлттық банк төрағасының орынбасары Бинұр Жаленов хабарлады.
Бұл ретте әңгіме 19 шілдеде іске қосылған мобильді төлемдердің жаңа банкаралық жүйесі туралы болып отыр. Ол бірыңғай QR-кодтан бөлек, әртүрлі банктер арасында телефон нөмірі арқылы аударымдар жасауды қамтиды.
«Жүйеде тәуекелдерді басқарудың жалпы жүйесі шеңберінде айқындалатын базалық лимиттер белгіленген. Қазіргі уақытта тиісті өзгерістер "Ашық НҚА" порталында талқылауға шығарылды. Егер олар қабылданса, жаңа лимиттер қазан айында-ақ күшіне енеді. Біз бір транзакция үшін лимитті 500 мыңнан 1 миллион теңгеге дейін арттыруды ұсынамыз», — деп түсіндірді Ұлттық банк басшысының орынбасары.
Сонымен бірге реттеуші орган соңғы шектеулер нақты қаржы институтына байланысты екенін нақтылады. Әрбір банк өзінің тәуекел саясаты шеңберінде өз клиенттері үшін тәуліктік лимиттерді дербес белгілеуге құқылы, ал пайдаланушылардың өздері де оларды мобильді қосымшалар арқылы жиі түзете алады.
Еске салсақ, бұған дейін де Қазақстанда QR-төлемдерді, банкаралық мобильді аударымдарды және цифрлық теңгемен жасалатын операцияларды ҚҚС төлеуден босату мүмкіндігі қарастырылып жатқаны белгілі болған еді.