В Атырау +21.1 
Әскерге шақыру науқаны бірнеше кезеңнен тұрады: шақырту қағазын алу, медициналық тексеруден өту, деректерді нақтылау және қажет болған жағдайда кейінге қалдыру рәсімдеу.
Шақырту қағазы қалай беріледі?
Бұл – азаматты жергілікті әскери басқару органына шақыратын ресми құжат. Ол қол қойдыру арқылы жеке беріледі, жұмыс орны немесе оқу орны арқылы жеткізіледі. 2025 жылдан бастап eGov.kz порталы, eGov Mobile қосымшасы және SMS арқылы да жіберіледі. Құжатта келу күні, уақыты және мекенжайы көрсетіледі. Дәлелсіз келмеген жағдайда әкімшілік жауапкершілік, ал жүйелі түрде жалтарған жағдайда қылмыстық жауапкершілік қарастырылған.
Қажетті құжаттар: жеке куәлік, тіркеу куәлігі, білім туралы құжат немесе оқу орнынан анықтама, медициналық қорытындылар, кейінге қалдыруға құқық беретін құжаттар.
Кейінге қалдыру кімдерге беріледі?
Отбасы жағдайына байланысты;
Білім алуды жалғастырып жүргендерге;
Денсаулық жағдайына байланысты;
Ауылдық жерлердегі педагогтер мен дәрігерлерге;
Депутаттарға;
Азаматтық авиация және кеме экипаждарына;
Құқық қорғау органдарының оқу орындарында алғашқы даярлықтан өтушілерге.
Кейінге қалдыру үшін тиісті құжаттарды ұсыну және шақыру комиссиясының шешімін алу қажет. Шетелде күндізгі бөлімде оқитындар оқу орнынан анықтама алып, eGov.kz арқылы өтініш береді.
Маңызды ескерту: шақырту қағазы бірден әскерге жіберуді білдірмейді. Ол көбіне деректерді нақтылау, медициналық тексеру және жарамдылық санатын анықтау үшін беріледі. Уақтылы дайындық болса, рәсім қиындықсыз өтеді.