В Атырау +21.1 
Қазақстан Қытайдың банкаралық облигациялар нарығында жалпы сомасы 6,6 млрд юаньды, шамамен 983 млн долларды құрайтын «панда-облигациялар» орналастырды. China Daily басылымының мәліметінше, бұл — Орталық Азия елдері арасындағы бір реттік ең ірі орналастыру.
Облигациялар екі траншпен шығарылды:
- үш жылдық облигациялар — 5 млрд юань, жылдық купондық мөлшерлемесі 1,82%;
- бес жылдық облигациялар — 1,6 млрд юань, жылдық купондық мөлшерлемесі 1,95%.
«Панда-облигациялар» — шетел мемлекеттері немесе компаниялары Қытайдың ішкі нарығында юаньмен шығаратын борыштық бағалы қағаздар.
China International Capital Corporation мәміленің негізгі ұйымдастырушысы әрі букраннері болды. Industrial and Commercial Bank of China, China Construction Bank, Bank of China және Export-Import Bank of China бірлескен ұйымдастырушылар және букраннерлер ретінде қатысты. Қазақстан тарапынан мәміленің жалғыз жергілікті менеджері Teniz Capital Investment Banking компаниясы болды.
Бұл — Қазақстанның биыл Қытай нарығында «панда-облигацияларды» екінші рет орналастыруы. Мамыр айында ел 3,4 млрд юань көлеміндегі алғашқы егеменді «панда-облигацияларын» шығарған еді. Екі орналастырудың жалпы сомасы 10 млрд юаньға жетті.
Бұл қадам Қазақстан мен Қытай арасындағы қаржылық ынтымақтастықты тереңдетуге, екі елдің капитал нарықтары арасындағы байланысты кеңейтуге және халықаралық есеп айырысуда юаньның рөлін арттыруға бағытталған.
Bank of China өкілдерінің мәлімдеуінше, мәміленің сәтті жүзеге асуы Қытайдың капитал нарығы шетел мемлекеттері үшін тартымды қаржыландыру алаңына айналып келе жатқанын көрсетеді. Сонымен қатар ол юаньның жаһандық қаржыландыру валютасы ретіндегі халықаралық ықпалын күшейтуге ықпал етеді.