В Атырау +20.8 
Қазақстанда көлікті басқаруға медициналық қарсы көрсетілімдері анықталған 10 мыңнан астам адамның жүргізуші куәлігінің қолданылуы тоқтатылды.
Заңбұзушылықтар Денсаулық сақтау министрлігі, Бас прокуратура және ІІМ ақпараттық жүйелері арасындағы деректер алмасудың арқасында анықталды.
Денсаулық сақтау министрлігі динамикалық медициналық бақылауда тұрған және көлікті қауіпсіз жүргізуге кедергі келтіретін аурулары бар азаматтар туралы мәліметтерді береді.
Денсаулық сақтау вице-министрі Ербол Оспановтың айтуынша, бұл жұмыс жалғасады. Қолданыстағы талап бойынша көлік басқаруға кедергі келтіретін аурулардың сегіз түрі белгіленген.
Бұл ретте сөз көлікті басқару құқығынан автоматты түрде өмір бойына айыру туралы емес, медициналық көрсетілімдер бойынша жүргізуші куәлігінің қолданылуын тоқтата тұру туралы болып отыр.
Қазақстанда жүргізушілікке үміткерлерді медициналық куәландыру процедурасы да цифрландырылды. Медициналық анықтама электронды форматқа көшірілді, ал комиссиядан өту нәтижелері енді мемлекеттік ақпараттық жүйеде көрініс табады.
Деректерді цифрлық алмасу белгіленген қарсы көрсетілімдері бар адамның жүргізуші куәлігін алуы немесе оны пайдалануды жалғастыру жағдайларын болдырмауға тиіс.