В Атырау +18.3 
Таразда жергілікті аурухананың қаза тапқан 29 жастағы қызметкерінің жақындары оның өліміне қатысы бар барлық адамды жазалауды талап етуде. Олардың айтуынша, ер адамды аяусыз соққыға жығып, өзінің жеке автокөлігімен медициналық мекемеге әкелген, деп хабарлайды «Криминальный Казахстан».
Қаза тапқан азаматтың қарындасының айтуынша, қайғылы оқиғаның алдында жанжал болған: науқастардың бірінің бұрынғы күйеуі ер адамға бірнеше рет қоңырау шалып, оған тіл тигізген әрі жеке кездесуді талап еткен. Белгіленген күні ол сөйлесуге келіскен.
Отбасының айтқан нұсқасы бойынша, қарсы тарап кездесуге жалғыз емес, екі танысымен бірге келген.
«Оның басынан темір затпен ұрып, жүксалғышқа салған және қала сыртындағы Аса өзеніне апарып, сонда аяусыз тағы соққыға жыққан», — деп өз нұсқасын білдірді туыстары.
Кейін зардап шегушіні өзі жұмыс істеген аурухананың қабылдау бөліміне өзінің көлігімен жеткізген. Оны әкелген адамдар ер адамды «көшеден тауып алдық» деп мәлімдеген. Ол алған жарақаттарынан есін жимастан көз жұмды.
Марқұмның жақындары тергеу барысына қатысты да алаңдаушылық білдіріп отыр. Қарындасының айтуынша, бастапқыда полиция үш күдіктіні ұстаған, бірақ кейін олардың екеуін босатып жіберген. Бұдан бөлек, отбасы негізгі куәгерге қысым жасалуы мүмкін екенін мәлімдеп отыр.
Қаза тапқан ер адамның артында екі кішкентай қызы қалды. Бірнеше күннен кейін ол 30 жасқа толуы тиіс еді.