​2035 жылға дейін Қазақстанға 3 миллионға жуық маман қажет болады

2035 жылға дейін Қазақстан экономикасының жаңа кадрларға деген жалпы қажеттілігі 2,9 миллион адамды құрайды. Бұл ретте бос орындардың басым бөлігі — 1,8 миллионы — жұмысшы мамандарға тиесілі болады. Бұл туралы Үкімет отырысында ҚР Еңбек және халықты әлеуметтік қорғау министрі Асқарбек Ертаев мәлімдеді.

Еңбек министрінің мәліметінше, бүгінде еңбекке қабілетті 9,8 миллион халықтың 9,4 миллионы жұмыспен қамтылған (жұмыспен қамту деңгейі — 96%). Дегенмен Электронды еңбек биржасындағы барлық хабарландырудың жартысынан астамы дәл осы жұмысшы кадрларға тиесілі.

Еңбек нарығындағы басты трендтер мен жаңашылдықтар:

• Кадрлар қай салада көбірек қажет: 2035 жылға дейін мамандардың ең үлкен тапшылығы өнеркәсіп, құрылыс, ауыл шаруашылығы және IT саласында болады деп болжанып отыр.

• Сұранысқа ие кәсіптер тізбесі 3,4 есе кеңейтілді: Басымдық берілген мамандықтар тізімі 51-ден 174-ке дейін артты. Оған инженерлер, құрылысшылар, өңдеу өнеркәсібінің мамандары, биотехнологтар, сондай-ақ жасыл және ядролық энергетика кадрлары енгізілді.

• Жасанды интеллект пен технологиялардың әсері: Жасанды интеллекттің дамуы нарық құрылымын қазірдің өзінде өзгертіп отыр: ескірген кәсіптердің бір бөлігі жойылады, көбі трансформацияланады, сонымен бірге жаңа технологиялық бағыттар пайда болады.

Ведомствода мемлекеттің басты міндеті жай ғана жұмыс орындарын құру емес, Қазақстан экономикасының нақты әрі келешегі бар сұраныстарына сай мамандарды алдын ала даярлау және қайта оқыту екені атап өтілді.