В Атырау +28.2 
Жүлделерді қайта есептегеннен кейін VI Дүниежүзілік көшпенділер ойындарының жалпыкомандалық есебінде Қазақстан бірінші орынды иеленді. Бұл туралы Қырғызстан президентінің баспасөз хатшысы Асқат Алагөзов мәлімдеді.
Оның айтуынша, туындаған келіспеушілікке медальдарды есептеу кезіндегі техникалық алшақтық себеп болған. Ұйымдастыру комитеті қазақстандық үш спортшының әрқайсысының жүлдесін бөлек ескеруге шешім қабылдады.
Өзгерістер енгізілгеннен кейін Қазақстан медальдар есебінде бірінші қатарға көтерілді.
«Осылайша, жалпы командалық есепте бірінші орынды Қазақстан иеленді. Қазақ бауырларымызды жеңісімен құттықтаймыз!» — деді Алагөзов.
Бұған дейін Қазақстанның Туризм және спорт министрлігі ұлттық құраманың 74 жүлде — 32 алтын, 20 күміс және 22 қола медаль жеңіп алғанын хабарлаған болатын. Алайда ұйымдастырушылар бастапқыда Қазақстанға тек 29 алтын медальді есептеп, бірінші орынға Қырғызстанды қойған еді. Үлкен қоғамдық резонанстан кейін даулы кесте өшірілді.
Қазақстандық ведомство өз есебінің жарыстың ресми хаттамаларына негізделгенін алға тартты. Енді қырғыз тарапы нәтижелерді қайта қарағаннан кейін Қазақстан құрамасының бірінші орнын растады.
Алагөзов сонымен қатар Қазақстан мен Қырғызстан командалары арасындағы спорттық бәсекелестік тек жарыс майданында ғана қалғанын атап өтті. Ол екі елдің спортшылары мен жанкүйерлеріне өзара құрмет көрсеткені үшін алғыс айтты.
VI Дүниежүзілік көшпенділер ойындары 31 тамыз бен 6 қыркүйек аралығында Қырғызстанда өтті. Жарысқа 113 елден 3 мыңға жуық спортшы қатысты.