В Атырау -10 
Ақтөбе қаласында сот 31 жастағы рэпер Омар Амантаевқа (сахналық есімі – Qarakesek) үкім шығарды. Ол психотроптық затты заңсыз сақтағаны үшін кінәлі деп танылды, деп хабарлайды newtimes.kz.
Сот процесі мәжбүрлі түрде жеткізумен өтті: алдыңғы отырысқа айыпталушы себепсіз келмеген.
Үкім бойынша Амантаевқа 100 сағат қоғамдық жұмыс тағайындалды. Ол пробация қызметінің бақылауымен қала көшелерін тазалауға қатысады.
Сонымен қатар, оған амбулаторлық психиатриялық емдеу міндеттелді.
Соңғы сөзінде музыкант кінәсін толық мойындап, төрт баланы тәрбиелеп отырғанын және емге мұқтаж екенін айтты.
Сот түсіндіргендей, егер ол қоғамдық жұмыстардан жалтарса, әр төрт сағат бір тәулік қамауға ауыстырылады.
Еске сала кетейік, өткен күзде Амантаев есірткілік мас күйінде көлік жүргізгені үшін ұсталған болатын. Оның көлігінен синтетикалық есірткі табылған. Сол кезде ол 15 тәулікке қамалып, жүргізуші куәлігінен жеті жылға айырылған еді.