В Атырау +4 
Атырау қаласында полиция қызметкерлері 66 жастағы зейнеткер әйелді ұстады. Ол Привокзальный шағын ауданында пәтерлерді аралап, ақырзаман туралы мазмұндағы діни парақшаларды таратқан, деп хабарлайды Halyqstan.
Ашық-қызғылт түсті парақшаларда:
«Послѣдній наборъ людей къ Богу изъ всѣхъ сатанинскихъ вѣръ и народовъ», - деп жазылған.
Дін істері басқармасының хабарлауынша, азаматша С. ешқандай діни ұйымға мүше емес екенін және мұндай әрекетті «жүрек қалауымен жасағанын» айтқан.
Оған қатысты Әкімшілік құқық бұзушылық туралы кодекстің 449-бабы (ұсақ бұзақылық, соның ішінде рұқсатсыз материал тарату) және 490-бабы (дін туралы заңнаманы бұзу, яғни діни әдебиеттерді заңсыз тарату) бойынша шара қолданылған.
«Полиция қызметкерлері әйелді бөлімге жеткізді. Тәркіленген материалдар дінтану сараптамасына жіберілді», — деп мәлімдеді ведомство өкілдері.
Басқарма өкілдері Қазақстанда миссионерлік қызмет заңмен реттелетінін және оны жүргізу үшін арнайы рұқсат қажет екенін, сондай-ақ, діни мазмұндағы материалдарды келісімсіз тарату — әкімшілік құқық бұзушылық болып саналатынын атап өтті.