В Атырау +17 
Қостанай облысында бес жасар баланың өліміне қатысты кісі өлтіру дерегі тергеліп жатыр. Құсмұрын кентінің тұрғыны болған бала басы мен денесіндегі көптеген жарақаттан көз жұмған. Қылмыс жасады деген күдікпен ер адам ұсталып, сот оны қамауға алу туралы шешім шығарды.
Жергілікті тұрғындардың айтуынша, баланың өліміне оның әкесі қатысы болуы мүмкін. Алайда бұл ақпарат әзірге ресми түрде расталған жоқ. Бұл туралы Tengrinews.kz хабарлады.
Қайғылы оқиға 2026 жылғы 26 қазанда Қостанай облысының Әулиекөл ауданында болған.
Алдын ала мәлімет бойынша, бес жасар бала басы мен денесінен көптеген жарақат алып, соның салдарынан қайтыс болған.
Әулиекөл аудандық полиция бөлімі Қазақстан Қылмыстық кодексінің 99-бабы 3-бөлігі, яғни жас баланы өлтіру дерегі бойынша сотқа дейінгі тергеуді бастады.
Күдікті оқиға болған күні ұсталды. Сот оны қамауда ұстауға санкция берді.
«Қазіргі уақытта іс бойынша қажетті тергеу әрекеттері жүргізіліп жатыр. Тергеу барысы облыс прокуратурасының бақылауында. Тергеу мүддесіне байланысты өзге ақпарат жария етілмейді», – деп хабарлады Қостанай облысының прокуратурасы.
Баланы өлтірді деген күдікке оның әкесі ілінді ме?
Tengrinews.kz мәліметінше, жергілікті тұрғындар баланың өліміне оның әкесі қатысы болуы мүмкін деп болжайды.
Алайда полиция мен прокуратура ұсталған ер адамның қаза болған баланың әкесі екенін ресми түрде растаған жоқ.
Бала наурыз айынан бері әкесімен бірге тұрған
Отбасындағы жағдайға қатысты қосымша мәліметті Қостанай облысындағы Бала құқықтары жөніндегі уәкіл Несібелі Басенова айтты.
Оның сөзінше, қаза болған бала балабақшаға барған. Анасы ата-ана құқығынан айырылған.
2026 жылғы наурызға дейін бала әжесімен бірге тұрған, кейін әкесінің үйіне көшкен.
«2025 жылғы 28 наурыздағы сот шешіміне сәйкес, бала әкесімен бірге тұруы керек болған. Әжесі баланы бермеген, алайда әкесі жалдаған адвокат араласқаннан кейін кәмелетке толмаған бала әкесіне көшкен», – деді балалар омбудсмені.
Сондай-ақ баланың көпбалалы отбасында тәрбиеленгені белгілі болды.
Күдікті өмір бойына бас бостандығынан айырылуы мүмкін
Қылмыстық іс жас баланы өлтіру бабы бойынша тергеліп жатыр.
Егер сотта күдіктінің кінәсі дәлелденсе, оған өмір бойына бас бостандығынан айыру жазасы тағайындалуы мүмкін.
Баланың өліміне әкеп соққан жарақаттарды қалай алғаны, қылмыстың болжамды себебі және күдіктінің жеке басы әзірге ресми түрде жарияланған жоқ.