В Атырау +3 
Тұрғындардың айтуынша, Қиғаш пен Шарон өзендерінің, олардың арналары мен Каспий теңізінің жағалау бөлігінің таяздануына байланысты жарияланған төтенше жағдайдан бері жағдай жақсармаған — су азайып барады, балық жоқ, кәсіп тоқтап тұр.
«Бұрын осы уақытта алғаш ауланған балықты өткізіп үлгеретінбіз. Қазір аулар жағада жатыр, су тізеден келеді, — дейді Алға ауылының балықшысы.
Әр отбасы балық аулаумен күнелтіп отырған бұл ауданда кәсіп тоқтап тұр. Балық уылдырық шашуға кірмейді, қайықтар қайраңда қалған, ал артельдерге құрлықтан қосымша табыс көзін іздеуге тура келіп отыр.
Арналар сусыз, жайылымдар кеуіп тұр
Әкімдік мәліметінше, су тек өзендерде ғана емес, егістік пен жайылымдарды суғаратын арық-каналдарда да тартылып қалған.
«Сиырлар сасық шалшықтың суын ішіп жүр, шөп күйіп кетті. Мұндай қуаңшылық болған жыл есімізде жоқ», — дейді шаруалар.
Суарылмаған жағдайда шаруашылықтар шығынға ұшырайды, ал жайылымдардың бір бөлігі қуаң далаға айналған.
Құрғаған арнаны қазу
Мәселені шешу үшін аудан әкімдігі жанынан жедел штаб құрылды. Қиғаш пен Шарон өзендерінің Татартелячье ауылынан Қызылжарға дейінгі 128 шақырым балық жүретін арналары тереңдетіледі деп жоспарланған. Каспийдің теңіз бөлігінде тағы 10,8 шақырымға тазалау жұмыстары жүргізіледі.
Жұмыстарды “Bertys Construction” ЖШС атқаруда.
«Біз арналарды қазу жұмыстарын бастадық. Көктемде су тасқынына байланысты үзіліс болуы мүмкін, бірақ жұмыстар келесі жылы да жалғасады», — деді аудан әкімі Абат Жаңғалиев.
Алайда, балықшылардың айтуынша, техника су жоқ жерлерді ғана қазып жатыр.
«Қазып жатқандары шаң. Бәрі есеп үшін істеліп жатыр», — дейді Нұржау ауылының тұрғындары.
Жергілікті халықтың сөзінше, егер балық жүретін арналар көктемге дейін тазаланбаса, уылдырық шашу науқанына қауіп төнеді. Балық өзенге көтерілмей, келер жылғы балық аулау маусымы да күйреуі мүмкін.
Гидрологтардың мәліметінше, Каспий теңізінің деңгейі Атырау облысы жағалауында жыл сайын төмендеп барады. Кей жерлерде теңіз жағасы екі-үш шақырымға шегініп, тереңдік кеме жүре алмайтын деңгейге түскен. Бұл тек балықшыларға ғана емес, таяз суда патрульге шыға алмай отырған шекарашыларға да қиындық туғызуда.
«Ғажайып күтпейміз. Тек қыстан аман шығуға көмек берсе дейміз — өтемақы, отын, жұмыс керек. Балық аулау тоқтады, бірақ күн көру керек қой», — дейді Қызылжар ауылының шарасыз қалған балықшылары.
Ләззат ҚАРАЖАНОВА