В Атырау +3 
Маңғыстау облысы Ақтау қаласының бір топ жұмыссыздары Президент Қасым-Жомарт Тоқаевтың атына үндеу жолдады.
"Біз, Ақтау қаласының жұмыссыз жүрген адамдары Сізден көмек сұраймыз. Бүгінде шамамен 5700 жұмыссыз бар. Алайда облыстағы Мансап орталығы ұсынған жұмыстармен келіспейміз, еңбекақысы мардымсыз, болмаса уақытша жұмыстарды ұсынады", - делінген Президенттің атына жолданған хатта.
Үндеу авторларының айтуы бойынша, Ақтау қаласының айналасында ірі компанияларға вакансия бөлінбейді.
"Бұл жөнінде Маңғыстау облысы әкімдігі, Ақтау қаласының әкімдігі, облыстық Мәслихатқа, прокуратураға, "AMANAT" партиясына ұжымдық хат та жолдадық. Осыдан кейін бірнеше рет кездесулер болғанымен мәселе шешілген жоқ" - дейді наразылық танытушылар.
Жұмыссыз жүрген азаматтардың қойып отырған талабы - Ақтау қаласының айналасында орналасқан ірі компанияларға жұмысқа орналасу үшін вакансия бөлу және себепсіз жұмыстан шығармау.
Ләззат ҚАРАЖАНОВА