В Атырау +2 
Аршалы аудандық соты түрмеге түскісі келіп, үшінші рет «теракт» туралы хабарлаған Ақмола облысының тұрғынына қатысты үкім шығарды.
Сот анықтағандай, 2025 жылғы тамызда мал бақташысы болып жұмыс істейтін адам «112» нөміріне қоңырау шалып, Астана қаласындағы автовокзалда жарылғыш зат қойылғаны туралы хабарлаған. Оқиға орнына уәкілетті қызметкерлер жіберіліп, тексеру барысында террористік акт туралы ақпарат расталмады.
Сотта М. кінәсін мойындап, өз әрекетін қазіргі уақытта тұрақты тұратын жерінің болмауына байланысты, бас бостандығынан айырылған тұлғаларға мекемеде тегін тамақ пен киім болатынын көздеп, осындай қадамға барғанын түсіндірді.
Сотталушы бұған дейін 2019 және 2023 жылдары терроризм актісі туралы көрінеу жалған хабарламалар бергені үшін екі рет сотталған. Жазаны тағайындауда, сот азаматтың осыған дейін де дәл осындай құқық бұзушылық жасағанын және одан сабақ алмағанын ескеріп, оны қайтадан қылмыс жасағаны үшін жауапқа тартты.
Сот үкімімен оған 2 жылға бас бостандығынан айыру жазасы тағайындалып, жазасын қатаң режимдегі колонияда өтейтін болды.