В Атырау +2 
Атырау облысы әкімінің орынбасары Марат Мурзиев отставкаға өтініш берді. Бұл оның бұрынғы қарамағындағы облыстық спорт басқармасының басшысы Дастанбек Коспановқа қатысты сот үкімі заңды күшіне енгеннен кейін болды.
Атырау облысы бойынша Мемлекеттік қызмет істері агенттігінің департаменті «Ақ Жайыққа» Марат Мурзиевтің өтініш бергенін растады.
Еске сала кетейік, ақпанда облыстық дене шынықтыру және спорт басқармасының басшысы Дастанбек Қоспанов ұсталған болатын. Тергеу деректеріне сәйкес, ол аға жаттықтырушыдан оқу-жаттығу жиындарына қосу үшін 1 миллион 700 мың теңге алып, жаттықтырушылардан тағы 2 миллион 400 мың теңгені «әртүрлі қажеттіліктер» үшін жинаған. Сондай-ақ ол іс жүзінде жұмыс істемеген адамдарға 1 миллион 100 мың теңге көлемінде жалған жалақы есептеген.
Екеуі де кінәлі деп танылды. Сот Қоспановты 4 жылға бас бостандығынан айыруға және мемлекеттік қызметте өмір бойы жұмыс істеуге тыйым салуға үкім шығарды. Оның сыбайласы Нұрлан Майлашев 3 жылға сотталды. Үкім заңды күшіне енді.
«Мемлекеттік қызмет туралы» заңға сәйкес, егер шенеуніктің қарамағындағы қызметкері сыбайлас жемқорлық үшін сотталса, оған жетекшілік ететін орынбасар міндетті түрде отставкаға өтініш беруі тиіс. Айта кетейік, соңғы бірнеше жылда Мемлекеттік қызмет істері агенттігінде мұндай жағдай тіркелмеген.
Алайда отставкаға өтініш беру лауазымнан кету дегенді білдірмейді. Атырау облысында мұндай прецедент бұрын да болған: облыс әкімінің орынбасары Серік Айдарбеков өз орнында қалған, ал оның қарамағындағы Серік Қамидолла пара алу бойынша айыпталған еді. Сол кезде шенеунікке тек қатаң сөгіс жариялаумен шектелген.
Жалпы алғанда, еліміз бойынша соңғы бес жылда 39 саяси қызметші отставкаға өтініш берген, бірақ олардың тек 15-і ғана қызметінен кеткен. Қалғандарына тек тәртіптік жаза қолданылып, өз орындарында қалған.
Ал Марат Мурзиевтің өзі өңірлік күн тәртібінде белсенділігін жалғастыруда: Атыраудың экологиясы мен санитарлық жағдайына қатысты жиындар өткізеді, өндірістік нысандарды тексереді, қоғамдық шараларға қатысады. Өткен жылы ардагерлер арасындағы каратэ бойынша әлем чемпионатында қола медаль да жеңіп алған. Мұндай «әмбебап сарбаздың» қызметте болғаны әлі де қажет шығар. Дегенмен, соңғы шешім облыс әкімінің еншісінде.
Анастасия ШЕРСТЯНКИНА