В Атырау 0 
Ақ Депо ауданы әкімдік пен қаланың басты көшелерінен небәрі бірнеше минуттық жерде орналасқан. Бірақ орталыққа жақын болғанымен, мұндағы халықтың тұрмысы жайлы емес: бұл жерде әлі күнге дейін көшелерде жарық жоқ, интернет әлсіз, ал мектеп маңындағы жолдар балалар үшін қауіпті.
Қалалық мәслихат депутаты Ілияс Қонысбаевпен кездесуде тұрғындар өз мәселелерін ортаға салып, жазбаша өтініш табыс етті.
Жолдар және қауіпсіздік
Алғаш болып Бауыржан Қуанғалиев сөз алды. Ол №13 мектептің маңында жаңбыр мен қар жауғаннан кейін үлкен шалшықтар пайда болатынын айтты: Абай көшесінен Канцев көшесіне дейінгі аралықтан балалар да, ересектер де өте алмайды. Жаңбыр жауғаннан кейін тұрғындарға бұл жерден су кешіп өтуге тура келеді.
Тұрғындар мектеп пен жақын дүкеннің арасына жаяу жүргіншілер өткелін орнатып, жол сызықтарын сызуды, белгілер мен «жасанды кедергілер» қоюды ұсынды. Демалыс және каникул күндері мектеп ауласының қақпасы жабық болғандықтан, автобус аялдамасы қолжетімсіз болып қалатыны туралы мәселе да көтерілді.
Игілік пен С. Меңдешов көшелеріндегі жағдай да алаңдатарлық. Белгілер орнатылғанына қарамастан, көліктер бұл жерде жылдамдықты жиі асырып жүреді. Балаларға қатысты қауіпті жағдайлар да болған.
Қараңғылық және «мыс кабельді» интернет
Чайковский, Каспий және Қараманов көшелерінің тұрғындары қараңғылыққа шағымданды.
«Қаланың барлық ауданына шамдар орнатылды. Тек бізде ғана жертөледегі сияқты қараңғы. Қараңғыда көліктер қатынайды, балалар мектепке барып-келеді. Бұл өте қауіпті», — деді олар.
Тағы бір мәселе — байланыс. Тұрғындардың айтуынша, Ақ Депода әлі күнге дейін ескі мыс кабельді қолданады. Ал уәде етілген талшықты оптикаға көшу он жылдан астам уақыттан бері кейінге шегеріліп келеді.
«Байланыс сапасы өте нашар, үнемі үзіліп кетеді. Халық ақысын уақытылы төлеп отыр, бірақ Қазақтелеком тек ажыратамыз деп қорқытады. Ал нақты әрекет жоқ. Депутаттан біздің ұжымдық өтінішімізді компания басшылығына жеткізуді сұраймыз», — деді Дүйсенбек Сүгіров.
Ілияс Қонысбаев өтініштерді әкімдікке, тұрғын үй-коммуналдық шаруашылық бөліміне, білім басқармасына және өзге де тиісті мекемелерге жолдайтынын айтты.
«Тұрғындар жайлылық пен қауіпсіздікті талап етуге толық құқылы. Депутаттың міндеті — сіздер мен жергілікті билік арасын байланыстырушы буын болу», — деп атап өтті ол.
Қалалық ТКШ бас маманы Қасым Қабаевтың айтуынша, ауданда көше жарығы орнатылады, бірақ әзірге оған қаржы қарастырылмаған. Қалған мәселелер бойынша да жұмыстар жүргізілетінін жеткізді.
Айгүл МАНСУРОВА