Атырау кіреберісіндегі көпір бұзылады

Облыс әкімі Серік Шәпкенов Атырау қаласындағы жол жөндеу жұмыстарын аралап, олардың барысымен танысты. Қазіргі таңда «Атырау–Астрахан» тас жолының қала аумағындағы 11,4 шақырым бөлігі қайта жаңартылуда. Жұмыс екі учаскеге бөлінген:

1. «Квадрат» булану алаңы – Сарыөзек көпірі (5 км) Келер аптада «Квадрат» булану алаңы маңындағы, ұзындығы 89 метр болатын қала кіреберісіндегі көпірді бұзу басталады. Бұл кезеңде көлік қозғалысы теміржол өткелі арқылы ұйымдастырылады. Бүгінде 2 шақырымға жолдың негізгі қабаты төселген, ал қыркүйекте осы аумаққа асфальт салу жоспарлануда. Жұмыс аяқталған соң, бұл 2 шақырым уақытша қозғалысқа ашылады.

2. Сарыөзек көпірі – И.Тайманов көшесіндегі айналма жол (6,4 км) Қыркүйек айында мердігер компания 5 шақырым жолдың бір бөлігін көліктер үшін ашуды көздеп отыр. Бұл учаскедегі жаңарту жұмыстары жыл соңына дейін 70%-ға орындалады деп жоспарланған.

Жоба бойынша тас жолдың ені 15 метрге дейін кеңейтіліп, төрт жолақты болады. Сондай-ақ, жаяу жүргіншілер жолы мен жарықтандыру орнату қарастырылған. Жол жабындысының жалпы қалыңдығы – 80 см. Толық аяқталу мерзімі – 2026 жыл.

Серік Шәпкенов мердігерлерге жұмысты сапалы әрі уақытылы орындауды тапсырды.