В Атырау +17.6 
Халықаралық жастар күні қарсаңында Атырау қаласы әкімдігінің қолдауымен және Жастар ресурстық орталығының ұйымдастыруымен жастарға арналған бос жұмыс орындары жәрмеңкесі өтті.
Өңірлік коммуникациялар қызметінің хабарлауынша, іс-шара 18 бен 35 жас аралығындағы жастарға кәсіби тәжірибе жинақтап, тұрақты жұмыс табуға мүмкіндік берді. 30-ға жуық өндірістік кәсіпорын, қызмет көрсету компаниялары мен мемлекеттік органдар 200-дей бос жұмыс орнын ұсынды.
Жәрмеңкеге Атырау қаласы әкімінің орынбасары Нұржан Ермұханов қатысып, қатысушыларды кәсіби мерекемен құттықтады:
«Жастар – ел болашағы. Мемлекетіміз оларға әрдайым қолдау көрсетіп келеді. Бүгінгі жәрмеңке — соның нақты көрінісі. Бұл іс-шара жастардың еңбек нарығына бейімделуіне, өз саласын табуына мүмкіндік береді. Баршаңызға сәттілік тілеймін», — деді ол.
Айта кетейік, жәрмеңке аясында жұмысқа орналастырылған жастардың тізімі алдағы бір апта ішінде сараланып, жарияланатын болады.