В Атырау +4 
Қазақстан Ресей енгізген бензин экспортына қатысты жаңа шектеулердің әсеріне ұшырамайды. Бұл туралы энергетика министрі Ерлан Аккенженов мәлімдеді.
Министрдің айтуынша, Ресей тарапы Аи-92 және Аи-95 маркалы бензин экспортына шектеу енгізуді үшінші жыл қатарынан жалғастырып келеді. Алайда бұл шектеулер Қазақстан секілді екіжақты индикативтік баланстар аясында үкіметаралық келісімдерге қол қойған елдерге қолданылмайды.
— Қазақстан осы келісімдерге сәйкес, 285 мың тонна ресейлік бензин импорттауға құқылы. Дегенмен қазіргі таңда еліміз бензинмен толықтай өзін-өзі қамтамасыз етіп отыр, — деді Ерлан Аккенженов.
Министрдің мәлімдеуінше, ішкі нарықта жағдай тұрақты. Тіпті Қазақстан тарихында алғаш рет 70 мың тоннадан астам бензин экспортталған.
— Бұл – отандық өндірістің жеткілікті деңгейде екенін және ел ішінде де, сыртқы нарықта да бензин тапшылығы жоқ екенін білдіреді, — деп қосты ол.
Сондай-ақ, министр заңсыз жолмен жанармай өнімдерін шекарадан тыс шығару әрекеттерінің алдын алу үшін бақылау шаралары күшейтілетінін айтты.