В Атырау +27 
2024 жылдың тамызындағы жай ғана күндердің бірі. Атырау тұрғыны, төрт баланың анасы Эльвира Капишева мектеп формасы мен оқу құралдарын алуға шыққан. Бәрі үйреншікті: асығыс, күйбең тірлік, үлкендері – 8 және 9-сыныпта, кенжесі – әлі тым кішкентай, үнемі назарда болу керек. Бірақ қарапайым күннің соңы күтпеген оқиғамен аяқталды — Эльвира жол апатына түсті. Көлік тізгінінде өзі болған, кінәсін де жасырмайды.
Оның көлігі шұғыл шақыртуға асығып бара жатқан жекеменшік клиника — Western көлігімен соқтығысқан. Сақтандыру арқылы зардап шеккен тарапқа 2 295 000 теңге өтемақы төленгенімен, клиника жалпы шығынды 11 миллион теңге деп бағалаған. Одан кейін келіссөздер, сотпен қорқыту, мәмілеге келу әрекеттері басталды. Эльвира бар болғаны 1 миллион теңге тауып бере алған.
– Төрт балам бар. Кенжем – екі жаста. Күйеуім жоқ, жалғызбастымын. Жасырынған да, қашқан да жоқпын. Бірақ жағдайым осы, шынымен де төлей алмаймын, – дейді Эльвира.
Тараптар ортақ шешімге келе алмай, клиника сотқа жүгінді. Іс Эльвираның қатысуынсыз қаралып, 2025 жылдың 15 сәуірінде Атырау қалалық соты Health Care Atyrau ЖШС талаптарын толық қанағаттандырды. Эльвира 4 285 000 теңге өтемақы, 130 800 теңге мемлекеттік баж және 75 000 теңге сараптама шығынын төлеуге міндеттелді.
Ең сорақысы — сот шешімін әйел тек жеке сот орындаушысы келгеннен кейін бір айдан соң білген. Қазір Эльвира істі қайта қарауды талап етіп отыр. Себебі сот жайлы ешқандай хабарлама алмаған, өз құқығын қорғай алмаған.
Жалғызбасты ана және мұраға қалған несие
Эльвира төрт баланы жалғыз тәрбиелеп отыр. Күйеуі бір жарым жыл бұрын ауыр дерттен көз жұмған. Артында аяқталмаған үй мен 6 миллион теңге несие қалған. Ол да енді Эльвираның мойнында.
Кенже қызы – екі жаста. Дәрігерлер оған балалардың церебралды сал ауруы (ДЦП), екі жақты есту қабілетінің жоғалуы және сөйлеу дамуының тежелуі диагнозын қойған. Бір құлағына ота жасалған, екіншісіне әлі жасалмаған. Бірақ Астанаға барып, қайта операция жасатуға Эльвираның не қаржысы, не күші жетпейді.
Ал Эльвираның өзінде — өкпе фиброзы. Дем жетпей, тынысы тарылып жүр. Отбасы тек балаға берілетін жәрдемақы мен мүгедектікке тағайындалған жәрдемге қарап отыр.
«Гүлзар» эпизоды
Сынақтар мұнымен де бітпеді. Сол жол апаты кезінде қызметтік көлік көпжылдық хризантемалар егілген гүлзарға кіріп кеткен. Заң бойынша жауапкершілік – апатқа кінәлі адамда. "Каспийдормостстрой" ЖШС бағалауы бойынша, шығын 702 000 теңге деп көрсетілген. Бірақ әйелдің жағдайына байланысты бұл сома 390 000 теңгеге дейін қысқартылған.
"КДМС" ЖШС мәлімдеуінше, апат салдарынан 156 түп хризантема жойылған. Бұл жасыл желек МЖӘ жобасы аясында отырғызылған. Дегенмен, қала әкімдігі жанындағы ТКШ бөлімі ешқандай залал болмағанын ресми түрде растаған. Соған қарамастан, мердігер компания өтемақы талап еткен.
Сотсыз-ақ қаржы өндіру үшін Эльвирамен гүл отырғызуға келісімшарт рәсімделген — яғни, ол бұл гүлдерді өзі тапсырыспен отырғызған сияқты. Осыдан кейін Эльвира несие алып, 390 мың теңгені төлеп берген, тек содан кейін ғана мердігер тарапынан шағымдар тоқтаған.
Оқиғаның түп мәні — мұндай әйелдерді ешкім қорғамайды
Бұл оқиға тек жол апаты мен гүлдер жайлы ғана емес. Бұл — заңдық формализм мен бизнестің қатыгез жүйесімен бетпе-бет қалып, таңдау құқығынан айырылған әйелдің хикаясы.
Ол өз жауапкершілігін жоққа шығармайды. Бірақ кешірім емес, түсіністік сұрайды. Кенже қызы бір күні дыбыс ести алса, ал өзі еркін тыныстай алсам деп тілейді.
Қиын жағдайға тап болған анаға көмектескісі келетіндер үшін карта реквизиттерін жариялаймыз.
Карта нөмірі: 4400 4303 8505 6798
Карта иесі: Islam Batyrgali (Эльвираның ұлы)
Айнұр САПАРОВА