АҚШ пен Қытай 3 айға баж салығын төмендетуге келісті

АҚШ пен Қытай күтпеген жерден үш айға өзара кедендік баж салығын төмендету туралы келісімге қол жеткізді, деп хабарлайды АА.

Келісімге сәйкес:

• АҚШ Қытайдан келетін тауарларға баж салығын 145%-дан 30%-ға дейін төмендетеді.
• Қытай АҚШ-тан келетін тауарларға баж салығын 125%-дан 10%-ға дейін азайтады.

Бұл шешім 2025 жылдың 14 мамырынан бастап күшіне енеді.

АҚШ Қаржы министрі Скотт Бессент пен АҚШ Сауда өкілі Джеймисон Гриер өткен демалыс күндері Женевада Қытай делегациясымен келіссөздер жүргізді.

Бессенттің айтуынша, тараптар 90 күндік уақытша жеңілдік туралы келісімге келді. Ол АҚШ пен Қытай арасындағы сауда қатынастарын шиеленістірмеу керектігін атап өтті.

"Біз Қытаймен маңызды әрі өзара құрметке негізделген келіссөздер жүргіздік. Екі тарап та қарым-қатынасты үзуге мүдделі емес. Болашақта тиімді кездесулер күтеміз, келіссөздер Женева механизмі аясында жалғасады", – деді Бессент.

Сауда өкілі Джеймисон Гриер АҚШ-тың Қытаймен сауда балансын жақсартқысы келетінін айтты.

"Біз келіссөздерді екі ел үшін де тиімді нәтижемен аяқтадық", – деді ол.

2 сәуірде АҚШ президенті Дональд Трамп Қытайдан келетін тауарларға қосымша баж салығын енгізетінін жариялады. Бұған жауап ретінде Қытай АҚШ тауарларына баж салығын арттырды, нәтижесінде сауда соғысы басталды. АҚШ Қытайдан келетін тауарларға баж салығын 145%-ға дейін, ал Қытай АҚШ тауарларына 125%-ға дейін көтерді. АҚШ басқа елдерге қосымша тарифтерді 90 күнге кейінге қалдырғанымен, Қытайға қатысты тарифтер күшіне енді.

АҚШ пен Қытай арасындағы келісім әлемдік нарыққа оң әсер етті.

• Қор нарығында оптимизм байқалды.
• АҚШ долларының бағамы басқа валюталарға қатысты нығайды.
• Доллар индексі қазіргі уақытта 101,7 деңгейінде тұр.

АҚШ пен Қытай сауда және экономикалық мәселелер бойынша келіссөздерді жалғастыру үшін арнайы механизм құруға келісті.

Демалыс күндері Женевада өткен кездесуде екі тарап сауда келіссөздерінде прогреске қол жеткізгенін мәлімдеді, бірақ толық мәліметтерді жарияламады.