В Атырау +4 
Еуропарламент Украинадан күштеп әкетілген балаларды қайтару туралы қарарды мақұлдады
Қарар 516 дауыспен қабылданды. Еуропарламент Ресейдің Украинадан күштеп әкетіп, депортациялаған балаларды қайтару туралы қарарды қабылдады. Бұл туралы 8 мамыр, бейсенбі күні Еуропарламенттің баспасөз қызметі хабарлады.
Құжатты 516 депутат қолдады, 34 депутат қалыс қалды, ал 3 депутат қарсы дауыс берді.
Қарарда Ресейдің Беларусьтің қолдауымен украиналықтардың ұлттық болмысын жою мақсатында жүргізіп отырған "геноцидтік стратегиясы" қатаң айыпталады.
Депутаттар украиналық балаларды күштеп әкету мен депортациялау, оларды заңсыз асырап алу, өлтіру, мәжбүрлі түрде орыстандыру және милитаризациялау тоқтатылуы тиіс деп мәлімдеді.
"Ресей барлық депортацияланған украиналық балалар туралы мәліметтерді жариялап, олардың амандығы мен қауіпсіздігін қамтамасыз етіп, ешқандай шартсыз Украинаға қайтаруы керек", – делінген қарарда.
Сонымен қатар, Ресей билігі халықаралық ұйымдарға – Халықаралық Қызыл Крест комитетіне, БҰҰ-ның Адам құқықтары жөніндегі Жоғарғы комиссары басқармасына және ЮНИСЕФ-ке депортацияланған украиналық балаларға қол жеткізу мүмкіндігін беруі тиіс.
Еуропарламент депутаттары ЕО-ның Украина билігін және халықаралық әрі үкіметтік емес ұйымдарды депортацияланған балаларды құжаттау ісінде қолдауды жалғастыруы қажет екенін атап өтті.
Сондай-ақ, депутаттар ЕО мен мүше мемлекеттерді украиналық балаларды қайтару жөніндегі халықаралық коалицияға қосылуға шақырды.
Олар халықаралық қауымдастық Ресейдің жауапкершілікке тартылуын қамтамасыз етуі керек деп есептейді. Бұл үшін Халықаралық қылмыстық сот, БҰҰ-ның Халықаралық соты және Украинаға қарсы агрессия қылмыстарын тергеу жөніндегі Арнайы трибунал арқылы үйлестіруді күшейту қажет.
Бұған дейін Украина Жоғарғы Радасының Адам құқықтары жөніндегі уәкілі Дмитрий Лубинец Ресейдің 20 мыңға жуық украиналық баланы күштеп әкеткенін мәлімдеген.