В Атырау -5 
Атырау облыстық балалар ауруханасында «Балалардағы жүре пайда болған және туа біткен жамбас-сан буынының ақауларын реконструктивті әдіспен емдеу» тақырыбында медициналық шеберлік сағаты өтті. Іс-шараға Түркиядағы «LIV Hospital» клиникасының ортопед-дәрігері, хирург, доцент, медицина ғылымдарының докторы Шенол Бекмез қатысты.
Шеберлік сағаты аясында 6 балаға жоғары білікті медициналық көмек көрсетіліп, күрделі көпдеңгейлі ота жасалады. Сонымен қатар Қазақстанның 12 дәрігері реконструктивті операциялардың инновациялық әдістемелері бойынша оқудан өтеді.
Іс-шара “Милосердие” қайырымдылық қорының бастамасымен және “Samruk-Kazyna Trust” әлеуметтік жобаларды дамыту қорының қолдауымен ұйымдастырылды. Қоғамдық қор жетекшісі Аружан Саин мұндай іс-шараның елімізде алпыс бірінші рет ұйымдастырылып жатқанын айтты.
- Бүгінгі шеберлік сағатының ерекшелігі — атақты хирургтың өзі Атырауға келіп, күрделі операцияларды жергілікті жерде жасауы. Оның үстіне балалар шетелге бармай-ақ, осы жерде емделе алады. Біз үш күн ішінде 6 балаға тегін күрделі ота жасаймыз, - деді Аружан Саин.
Сондай-ақ шеберлік сағатқа Мәскеу, Алматы қалаларынан білікті дәрігерлер келіп қатысты. Ота жасайтын бас дәрігер Шенол Бекмес бұған дейін Атырауға төрт рет келіп, осы ауруханада балаларға ота жасаған.
- Біздің мақсатымыз – заманауи технологияларды пайдалана отырып, науқастардың өмір сапасын арттыру және қозғалу мүмкіндігін қалпына келтіру, - деді хирург.
Атырау облысы Денсаулық сақтау басқармасының басшысы Қайсар Абдалиев шетелдік мамандарға және ұйымдастырушыларға алғысын білдіріп, мұндай игі бастамалардың өңірлік медицинаға зор үлес қосатынын атап өтті.