В Атырау 0 
Атыраудағы жасыл желектерді күтіп-баптау бойынша мемлекеттік-жекеменшік әріптестік (МЖӘ) жобасына қатысты сот ісі екі жылдан астам уақытқа созылды. Алғашында конкурс тек белгілі бір компанияларға ғана қолжетімді етіп ұйымдастырылған, бірақ сот бұл әрекеттерде елеулі заң бұзушылықтар болғанын анықтады.
Атырау облысы бойынша Бәсекелестікті қорғау және дамыту агенттігінің департаменті Табиғи ресурстар басқармасының іс-әрекеттеріне күмән келтіріп, тергеу жүргізді. Нәтижесінде конкурс шарттары нақты бір қатысушыларға артықшылық беретіндей етіп жасалғаны, ал басқа үміткерлер үшін қатысу мүмкіндігін шектейтін кедергілер қойылғаны анықталды.
Облыстық сот бұл мәселеге нүкте қойып, басқарманың әрекеттері бәсекелестік туралы заңнаманы бұзғанын және конкурс шарттарының бір бөлігі заңға сәйкес келмейтінін мәлімдеді. Сонымен қатар, сот Табиғи ресурстар басқармасы мен "Atyrau Innovations" компаниясына арнайы ескерту жасап, мұндай заң бұзушылықтарды қайталамауды тапсырды. Айта кетейік, "Atyrau Innovations" компаниясы 2014 жылы Атырау облысы әкімінің қаулысымен құрылған.
Енді Атырауды көгалдандыру жобасына басқа да жеке компаниялар қатыса алады. Басқарма өкілдері адал бәсекелестік – заң талабы екенін атап өтті. Атырауда мемлекеттік жобаларды өз мүддесіне бейімдеуге тырысқан әрекеттер сотқа дейін жетуі мүмкін.