БҚО-дағы ауыл тұрғындары мұнай-газ кен орнына жақын болғандықтан қоныс аударады

Батыс Қазақстан облысының Байтерек ауданына қарасты Петрово ауылын көшіру жоспарлануда. Бұл ауыл Рожков мұнай-газ кен орнының маңында орналасқан. Ресми түрде санитарлық аймақта болмаса да, жергілікті билік тұрғындарды олардың қалауы бойынша көшіру туралы шешім қабылдады, деп хабарлайды "Мой Город" басылымы.

Аудан әкімі Марат Тоғжановтың айтуынша, Петрово ауылында 16 отбасы, оның ішінде бір көпбалалы отбасы тұрады. Тұрғындарды Январцево ауылына көшіру үшін жаңа үйлер салу көзделген. Жобаға 300-350 миллион теңге қажет. Қазіргі уақытта құрылыс үшін жер бөлу мәселесі қарастырылып жатыр, ал қаржыландыруды облыстық әкімдіктен сұрау жоспарлануда.

Бұл жағдай 2014 жылы Березовка ауылының тұрғындарын көшіру оқиғасын еске салады. Ол кезде Қарашығанақ кен орнынан тараған зиянды қалдықтардың салдарынан балалар мен ересектер жаппай ауруханаға жатқызылып, билік ауылды Ақсай мен Аралталға көшіруге мәжбүр болған еді.

Айта кетейік, Рожков газконденсат кен орны 2023 жылдың желтоқсанында өнеркәсіптік пайдалануға берілді. Ол 2008 жылы геологиялық барлау жұмыстары нәтижесінде ашылған.

2040 жылға дейін бұл жерде 14,2 миллиард текше метр газ және 7,1 миллион тонна конденсат өндіру жоспарланған. Бұл кен орнының игерілуі Ұлттық қорға 501 миллиард теңге, ал жергілікті бюджетке 110 миллиард теңге кіріс әкеледі деп күтілуде.

Жер қойнауын пайдалану құқығына «ҚазМұнайГаз» (50%), венгриялық MOL Group (27,5%) және қытайлық Sinopec (22,5%) компанияларынан құралған бірлескен кәсіпорын ие.