В Атырау -2 
Қазақстан Республикасы Парламенті Мәжілісінің депутаты Асхат Аймағамбетов елдегі жеке мектептердегі жалақы төлеу мәселесі қиын екенін хабарлады.
Оның айтуынша, кейбір мұғалімдер 2024 жылдың желтоқсан айындағы жалақысын әлі күнге дейін ала алмай отыр.
«Күтілгендей, жағдай қиындай түсті. Жеке мектептердегі мұғалімдер айлап жалақы ала алмай жүр. Тіпті өткен жылдың желтоқсанындағы жалақысы төленбеген мектептер бар», – деп жазды депутат әлеуметтік желілерде.
Аймағамбетов жеке білім беру мекемелері елдің жалпы білім беру жүйесінің бір бөлігі екенін, онда жүздеген мың бала оқитынын, бұл сектордағы мәселелерді елемеу жалпы саланың тұрақтылығына қауіп төндіретінін атап өтті.
«Жеке мектептерге әртүрлі көзқарас болуы мүмкін. Ондағы білім сапасына қатысты мәселелер де жоқ емес. Бірақ ең бастысы – бұл баламалы нұсқа, бұл бәсекелестік. Осы мәселенің шешімін табуға үміттенемін», – деп қосты ол.
2025 жылдың басында депутат жеке мектептердің қаржыландыру тапшылығы мәселесін көтерген болатын. Әсіресе, мемлекеттік тапсырыс қаражатына ғана тәуелді мектептерде жағдай күрделі екені айтылған. Сол кезде ондаған мектеп банкроттықтың алдында тұрғаны, жалпы қаржыландыру тапшылығы 80 миллиард теңгеге жеткені хабарланған.
Көптеген білім беру мекемелері 2023 және 2024 жылдарға арналған төлемдерін ала алмаған. Бұл жалақының кешігуіне, штаттың қысқаруына және білім беру қызметтерінің сапасының төмендеуіне алып келді.
Асхат Аймағамбетов Оқу-ағарту министрлігі мен үкіметті жеке білім беру секторының қаржылық тұрақтылығын қамтамасыз ету және жағдайды тез арада реттеу үшін шұғыл шаралар қабылдауға шақырды.