В Атырау -1 
Бүгін, 23 сәуірде Атырау қаласындағы «Абай» орталығында жас ұстаздарға арналған UstazHub форумы өтті. Іс-шараны қалалық білім бөлімі Білім-инновация қоры және «Qundylyq.kz» оқу орталығымен бірлесіп ұйымдастырды.
Шара сахналық қойылыммен басталды. Онда сабақ барысындағы оқушы мен мұғалім арасындағы диалог көрсетіліп, оқушылардың БЖБ мен ТЖБ-ға дайындық кезіндегі уайымдары бейнеленді.
Қазіргі таңда Атырау қаласында 78 мыңға жуық оқушы білім алып жатыр. Оларға 7000-нан астам мұғалім сабақ береді. Оның ішінде 1900-ден астамы — еңбек өтілі 7 жылға дейінгі жас мамандар. Форумға қалалық мектептерден 500-ге жуық жас ұстаз бен мектеп директорлары қатысты.
Бұл форум UstazHub жобасы аясында тоғызыншы рет өткізіліп отыр, ал Атырау — аталмыш шараны қабылдап отырған он төртінші өңір.
Іс-шара аясында цифрландыру, тәрбие, ұлттық құндылықтарды білім беру процесіне енгізу және ата-аналар мен мектеп арасындағы байланысты нығайту мәселелері талқыланды.
«Білім-Инновация» лицейлері мұғалімдерінің тәжірибесін еліміздің жалпы білім беретін мектептеріне енгізу жоспарлануда.
Айнұр САПАРОВА
Суреттерді түсірген автор