В Атырау +4 
Украина президенті Владимир Зеленский Ресейдің жарияланған «пасха бітімін» бұзғанын мәлімдеді. Оның айтуынша, Ресей Украина аумағын атқылауды жалғастыруда. Бұл туралы ол Украина Қарулы Күштерінің бас қолбасшысы Александр Сырскийдің 6:00-дегі жағдай бойынша берген есебіне сілтеме жасап айтты, деп хабарлайды АА.
Президенттің айтуынша, майданның әртүрлі бағыттарында 59 ресейлік атқылау және 5 шабуыл әрекеті тіркелген. «Старобельск» аймағында бір ұрыс қақтығысы, «Донецк» аймағында Покровск және Новопавловск бағыттарында үш қақтығыс, ал Запорожье бағытында Степное маңында бір қақтығыс болған. Сондай-ақ, қарсылас тарап FPV-ты бірнеше рет қолданған.
Президенттің айтуынша, кешегі 18:00 мен бүгінгі 00:00 аралығында Ресей армиясы 387 рет атқылау және 19 шабуыл әрекетін жасаған. Сонымен қатар, Ресей Қарулы Күштері 290 рет дрондарды қолданған.
"Ресей армиясы атысты тоқтату туралы жалпы әсер қалдыруға тырысады, бірақ кейде алға жылжып, Украинаға шығын келтіруге әрекет жасауын тоқтатпай отыр. Ресей тыныштық шарттарын толық орындауы керек. Украина бүгінгі күні сағат 24:00-ден бастап 30 күнге тыныштықты жүзеге асыру және ұзарту туралы ұсынысын күшінде қалдырады", - деді мемлекет басшысы.
Ресей Қорғаныс министрлігінің мәліметінше, Украина Қарулы Күштері атысты тоқтату жарияланғаннан кейін 444 рет Ресей позицияларын атқылаған және 900 дрон соққысын жасаған. Ведомство бейбіт тұрғындар арасында қаза тапқандар мен жараланғандар бар екенін, сондай-ақ азаматтық нысандарға зақым келгенін хабарлады.
Ресей президенті Владимир Путин бұған дейін 19 сәуір 18:00-ден 21 сәуір 00:00-ге дейін Пасха мерекесіне байланысты атысты тоқтату туралы жариялаған болатын.