В Атырау
+22 
АҚШ Қытайдың «Чангуан ғарыштық спутник технологиясы» компаниясын Йемендегі хуситтер қозғалысына спутниктік суреттер арқылы қолдау көрсетті деп айыптады, деп хабарлайды ҚазАқпарат.
Reuters агенттігінің хабарлауынша, АҚШ Мемлекеттік департаментінің өкілі Тэмми Брюс бұл компанияның хуситтерге тікелей көмек көрсетіп отырғанын мәлімдеді. Оның айтуынша, Қытай үкіметі бұл мәселеге қатысты АҚШ-пен байланыс орнатқанына қарамастан, компанияны қолдауды жалғастыруда.
Хуситтер 2023 жылдың қараша айынан бастап Қызыл теңіз бен Аден шығанағындағы кемелерге шабуыл жасай бастаған. Олар бұл әрекеттерін Газа секторындағы палестиналықтарға қолдау көрсету мақсатында жасап жатқанын мәлімдеген. Бұл шабуылдар Суэц каналынан өтетін жүк тасымалына кедергі келтіріп, көптеген компанияларды Африканың оңтүстігі арқылы айналма жолмен жүруге мәжбүр етті, нәтижесінде тасымалдау құны күрт өсті.
«Чангуан ғарыштық спутник технологиясы» компаниясы 2023 жылы АҚШ санкция тізіміне енгізілген болатын. Себебі, ол Ресейдің Украинаға қарсы соғысында маңызды рөл атқарған Вагнер тобына жоғары дәлдіктегі спутниктік суреттер берген деген күдікке іліккен. Бұл компанияның әрекеттері халықаралық қауымдастықтың назарын аударуда.