Балық аурулары бақылауда: Еркінқалада симуляциялық оқу-жаттығу өтті

Атырау облысындағы Еркінқала ауылында балық өсіру зауытының аумағында ерекше жаттығулар өткізілді.  Балықтар арасында қауіпті ауру пайда болған жағдайда қалай әрекет ету керектігін пысықтады. Сценарий мүмкіндігінше шындыққа жақын болды: балықтар ауырып қалып, мамандар, техника және барлық шұғыл қызмет жұмылдырылды, деп хабарлайды Балық шаруашылығы комитеті.

Оқу-жаттығуға 42 маман қатысты, 21 бірлік техника жұмылдырылды. Қатысушылардың қатарында Ветеринарлық бақылау және қадағалау комитетінің өкілдері мен аумақтық бөлімшелерінің қызметкерлері, Атырау облысының ауыл шаруашылығы және жер қатынастары басқармасының өкілдері, Жайық-Каспий облысаралық балық шаруашылығы бассейндік инспекциясы, табиғи ресурстар басқармасы, қала әкімдігі, ветеринария станциясы мен зертханасы, Республикалық эпизоотиялық отрядының филиалы, сондай-ақ «Амангелді» балық кәсіпорнының өкілдері болды. Бәрі бірігіп зарарлы су қоймасын оқшаулау, диагноз қою, залалсыздандыру және халықты ақпараттандыру мәселелерін, өзара іс-қимылдың моделін сәтті пысықтады.

Ұйымдастырушылардың айтуынша, мұндай жаттығулар тек «көзбояушылық үшін» ғана емес, биологиялық қауіптерге дайындықты шынымен арттырады. Айтпақшы, мұндай іс-шаралар Дүниежүзілік жануарлар денсаулығы ұйымымен халықаралық ынтымақтастық аясында өтеді.

Бұдан шыққан қорытынды: егер шынайы өмірде су қоймаларындағы балықтар ауырып қалса, Атырауда не істеу керектігін біледі.