Электрокарлардың Атырау алаңына қайта оралуы – заңсыз

Атырау тұрғындары мәдени демалыс және жаяу серуендеу орындарындағы бейберекетсіздікке қайта шағымдануда. Батуттар, электромобильдер, ойыншықтар мен азық-түлік сататын шатырлар жағалау мен алаңдар кеңістігін толтырып тастаған. Ал осындай жерлерде мұндай қызмет көрсетуге ресми түрде тыйым салынған.

Еске салайық, 2023 жылы Атырау әкімдігі жылжымалы аттракцион иелеріне түсіндіру жұмыстарын жүргізген болатын. Сол кезде кәсіпкерлерге барлық жабдық қауіпсіз, тіркеуден өткен және стандартқа сай болуы керек деп ескертілді. Ең бастысы, оларға жаңа орын - Нұрсая ықшамауданындағы Салтанат сарайының алдындағы алаң берілді. Сондай-ақ қала аумағында ойын-сауық және ойын қызметтерін жүзеге асыру үшін төрт орын белгіленді: К.Смағұлов және С.Мұқашев аллеялары, сондай-ақ Привокзальный ықшам ауданындағы №24 және №28 орта мектептердің жанындағы саябақтар.

Бәрі шешілгендей көрінген. Бірақ көктем келіп, аттракциондар болмауы тиіс жерлерде қайта пайда болды.

Әкімдік мәліметінше, қазіргі уақытта кәсіпкерлердің ешқайсысы жабдықты тіркеуге қоймаған. Яғни, заңды түрде олар қауіпсіздік стандартын бұзуды жалғастыруда.

«Бәрін басқа жерге көшірдік, электр жарығын қостық, дайындалуға уақыт бердік, бірақ олар қайта оралды. Заңды бұзып, елемей отыр», -  деп мәлімдеді қала әкімінің орынбасары Мейіржан МҰҚАСОВ.

Полиция қызметкерлері енді күнделікті рейдтер жүргізуде, бірақ ескертулердің әсері шамалы сияқты. Бір қызығы, жақында Исатай мен Махамбет алаңында шектеулер тізімі бар ақпараттық тақта пайда болды: енді жағалауда электроскутер, велосипед, гироскутермен жүруге тыйым салынған. Билік бұл қауіпсіздікті арттырып, аумақты жаяу серуендеу үшін сақтауы тиіс деп санайды.

Дегенмен, егер тыйымдар нәтиже бермесе, заңның сақталуын кім қадағалауы тиіс?

Анастасия ШЕРСТЯНКИНА