Қытай АҚШ үшін импорттық баж салығын 125%-ға дейін көтергенін жариялады

Қытай АҚШ-тан импортталатын тауарларға кедендік баж салығын 84%-дан 125%-ға дейін көтергенін жариялады. Бұл шешім Вашингтонның Қытай өнімдеріне баж салығын арттыруына жауап ретінде қабылданды, деп хабарлайды АА.

Қытайдың Мемлекеттік кеңесінің Кедендік баж салығы комиссиясы мәлімдемесінде қазіргі баж салығы деңгейінде АҚШ-тан импортталатын тауарлардың Қытай нарығында орын таба алмайтыны айтылды. Сонымен қатар, Қытай АҚШ-тың баж салығын одан әрі арттыруына назар аудармайтынын атап өтті.

Қытайдың Сауда министрлігі АҚШ-қа қарсы Дүниежүзілік сауда ұйымына (ДСҰ) шағым түсіргенін хабарлады. Қытай өз заңды мүдделері мен құқықтарын қорғауды, сондай-ақ көпжақты сауда жүйесі мен халықаралық экономикалық тәртіпті сақтауды жалғастыратынын мәлімдеді.

2025 жылдың 2 сәуірінде АҚШ президенті Дональд Трамп шетелдік сауда серіктестерінің тауарларына «қарсы баж салығы» енгізгенін жариялады. Бұл тізімге 185 мемлекет кірді. Қытайға баж салығы 34%, ал ЕО елдеріне 20% мөлшерінде белгіленді.

Қытай АҚШ-тың шешіміне жауап ретінде 34%-дық қосымша баж салығын енгізді. Трамп Қытайдың бұл баж салығын жоймаған жағдайда, АҚШ қосымша 50%-дық баж салығын енгізетінін мәлімдеді. Қытай бұл қоқан-лоққыға жауап ретінде баж салығын 84%-ға дейін көтерді.

Сауда қақтығысының нәтижесінде АҚШ Қытай тауарларына баж салығын 125%-ға дейін арттырды. Қытай бұл жағдайға қарсы әрекет етуді жалғастыратынын мәлімдеді.