​КҚК мұнай айдау станциясы мамыр айының соңына дейін жұмысын қайта бастайды

Ақпан айында дрондар шабуылынан зардап шеккен "Кропоткинская" мұнай айдау станциясы мамырдың аяғында пайдалануға беріледі, деп хабарлады Каспий құбыр консорциумының (КҚК) баспасөз қызметі.

КҚК хабарлауынша, нысанда жөндеу жұмыстары жалғасуда. КҚК бас директоры Николай Горбань жөндеу барысымен танысып, ресейлік жабдықтарды шетелдік жабдықтардың орнына бейімдеу және қажетті қосалқы бөлшектердің бар-жоғы туралы ақпарат алды.

Шабуыл 17 ақпанға қараған түні болды. Ресей билігінің мәліметінше, Краснодар өлкесіндегі станция жеті ұшқышсыз ұшақтың шабуылына ұшыраған. Соның салдарынан "Кропоткинская" шұғыл түрде тоқтатылып, Теңіз-Новороссийск бағытымен апаттық схема бойынша мұнай тасымалдау бағыты өзгертілді.

Тигізілген зақым көп болып, «Транснефть» жөндеу жұмыстары екі айға созылатынын ескертті. Бұл шабуыл мұнай тасымалы көлемінің 30%-ға дейін төмендеуіне әкелуі мүмкін деген болжам жасалған еді. 

Украина Бас штабы Краснодар өлкесіндегі мұнай инфрақұрылымы нысандарына, соның ішінде Ильский мұнай өңдеу зауытына, "Кропоткинская" мен "Андреаполь" станцияларына соққы берілгенін растады. Оқиға орнында ауқымды өрт тіркелді.

Алайда, КҚК қалпына келтіру жұмыстары кесте бойынша жүріп жатқанын және станцияның мамыр айында штаттық режимде іске қосылатынын мәлімдеді.