Трамп Ресей-Қытай одағын бұзғысы келеді - WSJ

Дональд Трамп Владимир Путинмен жақындасып, АҚШ-тың басты қауіпі деп санайтын Мәскеу мен Пекин альянсын әлсіретуді көздеп отыр. The Wall Street Journal мәліметінше, Вашингтон Украинадағы соғыс басталғаннан кейін Ресейдің Қытайға тәуелділігі артып, олардың одағы қос супердержаваға айналып бара жатқанына алаңдаулы, деп хабарлайды BILD.

АҚШ Украинадағы соғыстың тез аяқталуы Ресейдің Қытай, Иран және Солтүстік Кореямен байланысын әлсіретеді деп үміттенеді. Бұл елдер қазірдің өзінде Мәскеуге қару-жарақ, дрондар мен зымырандар жеткізіп жатыр, ал Пхеньян тіпті әскерлерін жөнелтті. АҚШ Мемлекеттік хатшысы Марко Рубионың айтуынша, Вашингтон Ресейдің Батыспен серіктестігін қайтарғысы келеді, өйткені «Мәскеумен геосаяси ынтымақтастық керемет мүмкіндіктер аша алады».

Алайда сарапшылар бұл жоспардың сәттілігіне күмән келтіреді. Германияның АҚШ-тағы бұрынғы елшісі Вольфганг Ишингер Қытай мен Ресейдің ажырауы екіталай деп санайды.

«Қытай өз ықпалын күшейтуде, Трамптан кейінгі келесі АҚШ президенті қандай саясатты таңдайтынын ешкім білмейді. Путин бос уәделерге сенбейді», — деді ол BILD-ке берген сұхбатында.

Сонымен қатар, Қытай мен Ресейдің өзі АҚШ пен Еуропа арасында жіктің пайда болғанын қалайды. ХДС партиясының Қытай бойынша сарапшысы Йоханнес Фолькманның пікірінше, Пекин мен Мәскеу трансатлантикалық одақты әлсіретуді көздеп отыр, бұл АҚШ-тың жаһандық көшбасшылығына қауіп төндіреді.

«Шектеулі әскери және саяси мүмкіндіктері бар еуропалықтарды Пекин салмақпен қабылдамайды», — деп түсіндірді ол.