​Трамп Украинаны сайлау өткізуге шақырды

АҚШ президенті Дональд Трамп Украина президенті Владимир Зеленскийді ауыстыруы ықтимал сайлау өткізілуі тиістігін мәлімдеді, Бұл жайында New York Post басылымы жазды, деп хабарлайды Кazinform агенттігі.

— Бізде Украинада сайлау болмаған, дұрысында Украинада әскери жағдай қолданылатын ахуал қалыптасып отыр, — деп мәлімдеді Дональд Трамп америкалық делегация Сауд Арабиясында ресейлік ресми тұлғалармен келіссөздер аяқтағаннан кейін Мар-а-Лагода өткен баспасөз мәслихатында.

Трамп Зеленскийдің алғаш рет 2019 жылы сайланғанын және сауалнама украиналық президенттің 50 пайыздан сәл жоғары бағаланатындығын көрсеткеніне қарамастан «мақұлдау рейтингі 4 пайыз» ғана екенін мәлімдеді.

Украинадағы президенттік сайлау 2024 жылдың сәуір айына жоспарланған еді. Алайда, 2022 жылдың ақпан айынан бері ел әскери жағдайда болғандықтан сайлау өткізілген жоқ.

2023 жылы Зеленский ел қорғанысқа ұйысу қажет кезде сайлау өткізу «саяси алауыздыққа» алып келетіндігін айтқан болатын.

Трамптың Зеленскийге қатысты риторикасы Путинмен телефон арқылы сөйлескеннен соң және командасы Сауд Арабиясында келіссөздер жүргізгеннен кейін соңғы аптада өзгеріп отыр.

— Олар үстел басынан орын алғысы келген кезде халық мұны жасау керектігін айтуға да болады. Украина халқы «бізде сайлау біраз уақыттан бері өтпегенін білесіздер ме?» деп айтпауы тиіс пе еді, — деді Дональд Трамп Украинаның кездесуге қатысу ниетіне жауап ретінде.

Сонымен қатар АҚШ президенті өзінің Украинада сайлау өткізу қалауын Ресейдің ісі емес екенін баса айтты.

— Бұл менің, көптеген өзге де елдің айтып отырғаны. Білесіздер ме, Украина құрып барады, — деді ол.

Мұнан ары Трамп Зеленскийді АҚШ Украинаға бүкіл соғыс кезінде бөлген қаражатты тиімсіз пайдаланды деп айыптады.

— Берген ақшаның бәрі қайда? Қайда кетті? Мен бұл жайында еш уақытта есеп-қисап көрген емеспін. Біз жүздеген млрд доллар береміз. Ешқандай есеп-қисабын көріп отырғаным жоқ. Сондықтан мен тыныштық көргім келеді, — деді Дональд Трамп.

Сондай-ақ АҚШ президенті Украина Ресеймен соғыс «бастаған» ел болғандығын мәлімдеді.

— Жұмыстың істелгенін ойлаймын. Енді бізде мүлдем басталуы тиіс емес соғыстың жалғасуына мүмкіндік берген басшылық бар, — деп атап өтті Дональд Трамп.

АҚШ мемлекеттік хатшысы Марко Рубио Сауд Арабиясындағы келіссөздер барысында Ресейге салынған санкцияларды алып тастау мәселесі талқыланбағанын айтып отыр.

— Әзірше әңгіменің ондай деңгейіне жеткен жоқпыз. Бірақ, мұны іс барысында талқылауға тура келері сөзсіз. Біз бұл процесті бастаған да емеспіз. Бүгін осы мәселелерді талқылау үшін процесті бастауға келісу ғана болды, — деді ол.

Ал Владимир Зеленский Ресейдің әлеуетті бейбіт жоспардың бөлігі ретінде Украинада жаңа сайлау өткізуге тырысатындығын алға тартып, бұл идеяны сынады. Ол Ресей президенті Владимир Путин тарапынан «ультиматумға» келіспейтіндігін мәлімдеді.

Айта кетейік, кеше Сауд Арабия астанасы Эр-Рияд қаласында АҚШ пен Ресей делегациясы алғаш рет бейбіт келіссөздер өткізді. 4,5 сағатқа созылған кездесуге Укркина өкілдері қатысқан жоқ.